Новыя гарызонты

У г. Брэсце адбыўся III абласны конкурс юных піяністаў «Новыя гарызонты».

Арганізатарамі абласнога конкурсу выступілі Брэсцкі аблвыканкам і Брэсцкі дзяржаўны музычны каледж імя Рыгора Шырмы.
Мерапрыемства праводзілася з мэтай падтрымкі таленавітых маладых музыкантаў і развіцця іх творчых здольнасцяў, папулярызацыі інструментальнай класічнай музыкі ў нашай рэспубліцы.
У конкурсе прынялі ўдзел навучэнцы дзіцячых музычных школ, дзіцячых школ мастацтваў і ўстаноў адукацыі. У іх ліку і прадстаўнікі нашага раёна.
Ад Столінскай дзіцячай школы мастацтваў змагаліся за перамогу ў конкурсе юныя піяністы Ганна Лукша і Уладзімір Сімончык – пераможцы многіх творчых конкурсаў, фестываляў не толькі рэспубліканскага, але і міжнароднага ўзроўняў. Ганна і Уладзімір падрыхтаваліся да конкурсу пад кіраўніцтвам таленавітага настаўніка Аксаны Камаровай і годна выступілі на сцэне музычнага каледжа.
Ганна Лукша ўзнагароджана дыпломам трэцяй ступені ва ўзроставай катэгорыі 14-16 гадоў, а Уладзімір Сімончык стаў уладальнікам дыплома за лепшае выкананне твора сучаснага кампазітара ва ўзроставай катэгорыі 10-13 гадоў.
Рэчыцкую дзіцячую школу мастацтваў прадстаўляла Вабішчэвіч Вераніка пад кіраўніцтвам настаўніка Кацярыны Гарбар. Дзяўчынка ўзнагароджана граматай за ўдзел у другім туры (узроставая катэгорыя 10-13 гадоў).
У якасці падарунка ўдзельнікам мерапрыемства стаў урачысты канцэрт-закрыццё конкурсу.
Людміла КАСПЯРОВІЧ