Любоў праз танец

08.02.2022

300

Rate this post

Ансамблю танца «Карамель», кіраўнік якога харэограф-педагог Алена Казеня, прысвоена званне «Узорны аматарскі калектыў Рэспублікі Беларусь».

Ансамбль быў створаны ў 2012 годзе на базе Рэчыцкай дзіцячай школы мастацтваў.

Упершыню дзіцячы ансамбль выступіў у раённым конкурсе сучаснага эстраднага мастацтва «Зоркі Палесся» і быў адзначаны граматай за выканальніцкае майстэрства. І амаль адразу яшчэ адна ўзнагарода – дыплом I ступені Рэспубліканскага танцавальнага фестывалю «DANSE FANTASY».

Калектыў вядзе рознабаковую канцэртную дзейнасць і прымае ўдзел амаль ва ўсіх грамадска-культурных акцыях і мерапрыемствах, якія праводзяцца на тэрыторыі нашага раёна. «Карамель» – актыўны ўдзельнік дабрачынных акцый і міжнародных праектаў, цесна супрацоўнічае з установамі адукацыі горада. Можа ганарыцца замежнымі творчымі паездкамі ў Італію, Эстонію, Украіну, што пашырае кругагляд юных танцораў і знаёміць іх з культурай іншых народаў.

Сёння ў склад ансамбля ўваходзіць 45 танцораў ва ўзросце ад васьмі да 16 гадоў. Рэпертуар ансамбля ўключае эстрадныя замалёўкі, жартоўныя танцы, стылізаваныя пастаноўкі, класічныя варыяцыі з балетаў, кадрылі, танцавальныя кампазіцыі народаў свету – рускія, украінскія, іспанскія, цыганскія. Але падмурак усё ж складаюць беларускія народныя і народна-сцэнічныя танцы: «Кросны», «Скокі», «Драпак», «Лявоніха», «Карапет» і інш.

Алена Казеня ўвесь час знаходзіцца ў пошуках новых ідэй, распрацоўцы цікавых нумароў і пастаноўцы яскравых харэаграфічных кампазіцый. З верасня 2020 года разам з Аленай Валяр’янаўнай ў якасці балетмайстра ансамбля працуе Таццяна Старасціна. Разам яны вельмі ўважліва ставяцца да падбору рэпертуару, імкнуцца далучыць удзельнікаў калектыву да нацыянальнай культуры і падарыць эстэтычную асалоду гледачам.

Напружаная праца ў калектыве пашырае магчымасці дзяцей, дазваляе раскрыць іх творчыя здольнасці, далучыцца да мастацтва і традыцый не толькі нашага народа, але і іншых. Заняткі праходзяць з улікам індывідуальных здольнасцяў і магчымасцяў кожнага ўдзельніка, асаблівая ўвага надаецца засваенню акцёрскіх навыкаў, лексіцы, пластыцы, мастацка-вобразнаму рашэнню харэаграфічных твораў. Прафессіяналы сваёй справы робяць вельмі многа для сваіх выхаванцаў і ўсяго дружнага калектыву.

Дапаўняе і надае своеасаблівы народны каларыт кожнаму твору жывое музычнае суправаджэнне інструментальнай групы, якой кіруе Фёдар Вайцяхоўскі. Танцы «Карамелі» кранаюць гледача да глыбіні душы. Апошнім часам калектыў наладзіў супрацоўніцтва з заслужаным аматарскім калектывам Рэспублікі Беларусь – народным інструментальным ансамблем «Брыз», што станоўча ўплывае на дзейнасць і творчасць абодвух.

– У склад нашага дзіцячага калектыву ўваходзяць таленавітыя дзеткі, з якімі вельмі прыемна працаваць, – падкрэслівае Алена Казеня. – Нездарма кажуць, что Століншчына славіцца сваімі талентамі. Яны валодаюць такімі якасцямі, як працаздольнасць, уважлівасць, выхаванасць, павага, стрыманасць, шчырасць, дабрыня.. Гэты пералік можна працягваць бясконца. Мне пашанцавала з маімі зорачкамі, з калегамі, аднадумцамі і сябрамі. Усе яны падтрымліваюць і радуюцца разам з намі новым дасягненням і перамогам. А ў такой спрыяльнай атмасферы нараджаюцца новыя ідэі і памкненні. Разам мы зможам

многае здейсніць, сведчаннем таму з’яўляецца канцэртная праграма,

падрыхтаваная для прысваення звання ўзорнага. Столькі станоўчых эмоцый і ў той жа час пережыванняў, гонару за свой калектыў, ды і ўвогуле за Століншчыну, нашу самабытнасць і непаўторнасць. Скразной ніццю канцэрта прайшла любоў да роднай краіны, яе культуры і адкрытых шчырых людзей, што мы змаглі перадаць праз танцы і літаратурныя кампазіцыі. Канцэрт прайшоў на высокім узроўні, але мы не будзем спыняцца. У нас яшчэ ўсё наперадзе. Я веру ў сваіх выхаванцаў і прадбачу, што ў «Карамелі» ўсё атрымаецца. Хачу таксама выказаць падзяку і дзеткам, і іх бацькам, і калегам за падтрымку і актыўны ўдзел. Гэта наша агульная перамога, таму віншую ўсіх нас!

Людміла

КАСПЯРОВІЧ

Post Views: 300

Обсуждение

Для отправки комментария Вам необходимо войти или зарегистрироваться.