Сёлета раённыя дажынкі будзе прымаць аграгарадок Кароцічы, дзе поўным ходам ідуць прыгатаванні да свята

Сёлета раённыя дажынкі будзе прымаць аграгарадок Кароцічы, дзе поўным ходам ідуць прыгатаванні да свята. Але трэба дадаць, што рыхтуюцца да сустрэчы з гасцямі і іншыя населеныя пункты Вялікамалешаўскага сельсавета – Вялікае Малешава, Альгомель, Талмачава.

Папрасіла старшыню сельвыканкама Таццяну Васюхневіч скласці ёй кампанію, каб на свае вочы пабачыць, як ідуць справы па падрыхтоўцы да святкавання. А яно, дарэчы, адбудзецца даволі хутка – у жніўні. Падрабязна спыніліся на кожным пытанні.

Агароджы
Таццяна Мікалаеўна не хавае, што складаней за ўсё давялося з жыхарамі, якім «пашанцавала» жыць на цэнтральных вуліцах. Дакладней з тымі, у якіх агаро-джы альбо не было, альбо ад яе засталася толькі назва. Таксама ўзнікалі праблемы з уласнікамі занядбаных дамоў, якія толькі фармальна з’яўляюцца гаспадарамі, а на самай справе не даглядаюць маёмасць.
– Давялося папярэджваць, расказваць пра адказнасць, – дзеліцца метадамі работы старшыня. – Але мэта была дасягнута – старыя будынкі былі знесены, а каля тых, якія ўласнікі вырашылі пакінуць, наведзены больш-менш парадак. Розная рэакцыя была на просьбу прыбраць каля сябе. Хтосьці пачынаў патрабаваць грошы на гэта, хтосьці казаў, што мой двор – мае праблемы і гэтак далей. Таму я ўдзячна тым жыхарам, якія пайшлі насустрач.
І сапраўды, толькі ў дзень нашага візіту адразу некалькі гаспадароў завіхаліся каля сваіх сядзіб. Віктар Юнчыц з Вялікага Малешава ў зялёна-белы колер фарбаў агароджу, даўжыня якой 75 метраў. Калі спытала, ці не надакучыла, ён з усмешкай адказаў: «А я пад настрой працую, тады справа шпарчэй ідзе».
У вёсцы Альгомель вы-мошчваў пліткай двор Аляксандр Бандаравец.
А вось сям’я Вяргун з вёскі Талмачава ў складзе бацькі Рыгора і сыноў Дзяніса і Дзмітрыя якраз займалася ўстаноўкай новай агароджы. Вырашылі рабіць яе са штыкетніку. Пад адзін памер яго падганяў Дзіма і ўзрадаваўся, што будзе ў Інстаграме «Навіны Століна».
Таццяна Мікалаеўна паказвае на тыя агароджы, якія былі пафарбаваны альбо ўсталяваны літаральна днямі. Некалькі жыхароў, якія не маюць магчымасці самастойна абгарадзіцца, заключылі дагаворы з мясцовымі гаспадаркамі, якія выканаюць работу за вызначаны кошт.

Дарогі
Для жыхароў Талмачава – свята: на дарозе праз усю вёску з’явіўся новы асфальт. Як удакладніў прараб Столінскага ДРБУ-141 Іван Козел, новае асфальтавае пакрыццё пакладзена на адлегласці 1 660 метраў.
Таксама праводзіўся рамонт дарог у іншых населеных пунктах, у тым ліку і саміх Кароцічах.

Будынкі
і тэрыторыі
Зараз поўным ходам ідуць работы каля Дома культуры ў Кароцічах, за якім і будзе адбывацца святочная праграма. А самая вялікая будоўля разгарнулася каля сярэдняй школы, дзе будзе адчынены новы дзіцячы садок. Зараз рабочыя ДБПМК-32 укладваюць плітку, вядуць унутраныя і вонкавыя работы. Частку з іх выконвае Столінская ПМК-24.
Рабочыя Альшанскага філіяла Столінскага райспа-жыўтаварыства надаюць новы выгляд магазіну «Родны кут».
Ідэальны парадак каля храма Мікалая Цудатворца, што з’яўляецца справай увішных прыхаджан.
Пераўтварылася памяшканне праўлення ААТ «Кароцічы», а таксама тэрыторыя каля яго. На гэта былі выдаткаваны сродкі з бюджэту арганізацыі ў памеры каля 200 тысяч рублёў. Таксама за кошт ААТ былі праведзены меліярацыйныя работы і зразанне дрэў паабапал дарогі.

Дрэвы
Калі зайшла размова пра старыя дрэвы, то Таццяна Мікалаеўна тлумачыць, што пазбавіцца да зараснікаў і старых аварыйных дрэў стала магчымым дзякуючы адразу некалькім арганізацыям. Частку спілавалі самі жыхары, якія забралі матэрыял дадому. Таксама прымаў у гэтай справе ўдзел Палескі лясгас. А самыя высокія і цяжкадаступныя дрэвы спілоўвалі работнікі ЖКГ.
Як бачым, справы па падрыхтоўцы да дажынак ідуць бойка. Таму няма сумнення, што Кароцічы сустрэнуць гасцей пры поўным парадзе.

Ганна МЕЛЬНІК
Фота аўтара