Маленькі свет, дзе цёпла і ўтульна

Не першы год на Століншчыне праходзіць раённы агляд-конкурс «Ветэранскі падворак». Яго арганізатары – раённы савет ветэранаў, раённая арганізацыя грамадскага аб’яднання «Белая Русь» і раённае аб’яднанне прафсаюзаў.

Мэта конкурсу – падтрымаць сацыяльны статус пажылога чалавека ў грамадстве, захоўваць сувязь пакаленняў, паляпшаць добраўпарадкаванне і ствараць дабратворныя ўмовы для развіцця асабістых падсобных гаспадарак, прапагандаваць вопыт па ўзорным утрыманні жылых дамоў і прысядзібных участкаў.
У аглядзе-конкурсе прымаюць удзел пенсіянеры, ветэраны вайны і працы, іх сем’і, якія маюць ва ўласнасці жылыя дамы з прысядзібнымі ўчасткамі і вядуць падсобную гаспадарку. Запрашэнні да конкурсу былі разасланы ва ўсе сельскія Саветы. Аднак згадзіліся паўдзельнічаць толькі сем канкурсантаў. І што цікава – акрамя догляду свойскай жывёлы і агарода яны паспяваюць трымаць свае ўчасткі ва ўзорным стане. І кожнаму ёсць што паказаць.
Нядаўна ў раённым савеце ветэранаў падведзены вынікі агляду-конкурсу. Арганізатары ў асобе старшыні раённага савета ветэранаў Анатоля Максімовіча і старшыні раённай арганізацыі грамадскага аб’яднання «Белая Русь», старшыні раённага аб’яднання прафсаюзаў Вячаслава Шэлеста ўручылі ўзнагароды пераможцам па месцы іх жыхарства.
Дыплома першай ступені ў намінацыі «Кветкавая фантазія» ўдастоена Неаніка Уладзіміраўна Лахадынава з в. Відзібор. Акрамя плантацый кветак розных колераў утульнасці падворку дадаюць пабудаваныя гаспадаром Сяргеем Фядосавічам альтанкі, адну з якіх ён прысвяціў 75-годдзю Перамогі ў Вялікай Айчыннай вайне. Побач штучны вадаёмчык і яшчэ шэраг архітэктурных задумак, на ажыццяўленне якіх у нядаўняга кіраўніка сельгаспрадпрыемства нарэшце з’явіўся час.
Пераможцамі ў намінацыі «Лепшы ветэранскі падворак» стала сям’я Леаніда Леанідавіча Вабішчэвіча з аг. Плотніца. Сваю сядзібу гаспадары ўпрыгожваюць не толькі кветкамі і дэкаратыўнымі раслінамі, але і малымі архітэктурнымі формамі, казачнымі героямі, тэматычнымі кампазіцыямі.
Падворак Уладзіміра Міхайлавіча Шынкарэвіча з в. Ямнае атрымаў намінацыю «Лепшы куточак адпачынку». Умелымі рукамі гаспадара выкананы шматлікія элементы дэкору па ўсёй сядзібе, а з веснічак сустракае раскідзісты клён, пад якім добрасуседнічаюць буслы і казачныя персанажы і размясцілася альтанка з …тэлевізарам.
Астатнія ўдзельнікі агляду-конкурсу адзначаны заахвочвальнымі прызамі: Любоў Адамаўна Гуцко з аг. Глінка, Ірына Уладзіміраўна Дзямідчык з аг. Рухча, Валянціна Міхайлаўна Сядляр з аг. Рамель і Таццяна Уладзіміраўна Пашкевіч з аг. Рубель.
Галіна ГАШЧУК
Фота аўтара