Ёсць жанчыны ў нашым раёне

На мінулым тыдні вынікі раённага тура рэспубліканскага конкурсу «Жанчына года – 2021» падвялі ў раённай арганізацыі ГА «Беларускі саюз жанчын».
Вышэйназваны конкурс стаў ужо традыцыйным у нашай краіне. Прыемна, што практычна ва ўсе гады сярод удзельнікаў і пераможцаў абласнога і рэспубліканскага тураў прадстаўніцы прыгожай паловы чалавецтва са Століншчыны.
Старшыня раённай арганізацыі БСЖ Таццяна Лабадзінская агучыла сёлетнія намінацыі конкурсу, а таксама запрасіла жанчын-удзельніц зрабіць візітную картку. Дарэчы, на раённым узроўні нашы жанчыны праявілі актыўнасць і выступілі ва ўсіх намінацыях.
Так, у намінацыі «Не старэюць душой ветэраны» пераможцай стала Людміла Кісель, якая была старшынёю раённай арганізацыі БСЖ з 1996 па 2010 гады. Газета публіквала артыкул пра дзейнасць Людмілы Пятроўны, якая ў свой час узначальвала раённы Савет дэпутатаў, а таксама была актыўнай удзельніцай грамадскіх арганізацый.
Сваю «Актыўную грама-дзянскую пазіцыю» выказала старшыня Столінскай раённай арганізацыі прафсаюза работнікаў адукацыі і навукі Людміла Цупа.
Напэўна, многія з жыхароў раёна добра ведаюць урача, можна сказаць, медыка па жыцці і прызванні, Вольгу Вабішчэвіч. Больш за сорак гадоў Вольга Сямёнаўна аддае сваёй любімай і самай гуманнай справе – лечыць людзей. Лагічным было тое, што яна была прадстаўлена ў намінацыі «Сэрца аддаю лю-дзям».
Дырэктар Столінскай дзіцячай школы мастацтваў Ніна Вайцяхоўская робіць першыя, але ўдалыя і станоўча ацэненыя крокі на гэтай кіруючай пасадзе. І тут дарэчы сказаць, што калі і молада, то зусім не зелена. Ніна Уладзіміраўна ў сваёй візітнай картцы, дарэчы, зробленай з цеплынёю і павагай калегамі і выхаванцамі, пазнаёміла са сваімі буднямі – як дырэктара і як выкладчыка. І яе намінацыя называецца «Паспяховы кіраўнік».
Адна з адметнасцяў Століншчыны – гэта яе мна-гадзетныя маці. «Мацярынская слава» – так называецца намінацыя, прадставіла якую Вольга Строк, дырэктар Столінскага раённага цэнтра турызму і краязнаўства дзяцей і моладзі, пераможца раённага конкурсу «Сям’я года» і шчаслівая маці трох дзетак.
«Гаспадыняй сяла» стала старшыня Стружскага сельвыканкама, старшыня пярвічнай арганізацыі БСЖ Ніна Ліпская. Вядома, што нялёгкая справа на жаночых плячах – несці адказнасць за вяскоўцаў, вырашаць іх праблемы, наводзіць парадак на тэрыторыі, ды яшчэ і заклікаць да належных паводзін асацыяльных элементаў. Але Ніна Іванаўна з гэтым спраўляецца на выдатна.
Не толькі хлебам адзіным жыве чалавек. Ён цікавіцца і прыгажосцю, культурнай спадчынай, духоўнымі патрэбамі. Напрыклад, Святлана Аблавацкая, загадчык аддзялення дзённага знаходжання для грамадзян сталага ўзросту Столінскага ТЦСАН, даўно вядома як аматар цікавых дэкаратыўных вырабаў. Прычым, спасцігала азы самастойна і працягвае рабіць гэта і далей. Ад кветак, элементаў інтэр’еру да лялек і шмат яшчэ чаго. Сваімі здабыткамі Святлана Леанідаўна шчыра дзеліцца з наведвальнікамі аддзялення. Было лагічным прадставіць яе ў намінацыі «Духоўнасць і культура».
У ходзе сумеснага пася-джэння праўленняў раённых арганізацый ГА «Беларускі саюз жанчын» і «Беларускі фонд міру» ўсе удзельніцы конкурсу атрымалі Падзячныя лісты і падарункі.
А ў абласным этапе конкурсу Століншчыну будуць прадстаўляць дзве жанчыны – Людміла Кісель і Ніна Вайцяхоўская.
Алена
КЛІМУШКА