ДЗЯЖУРНЫ КАРЭСПАНДЭНТ: ХОЧАМ ПРЫБРАЦЬ ЛЕС, А НАМ НЕ ДАЮЦЬ

З такой скаргай звярнуліся жыхары вёскі Хорск у час выязной рэдакцыі. Мужчыны абураліся, маўляў, хочам вывезці старыя паваленыя дрэвы з лесу, а нам не даюць.
– Гэты лес нам вельмі дарагі і мы хочам, каб ён быў чысты. А то пойдзеш ў грыбы, пераступіць нельга, ляжаць паваленыя дрэвы, а мы іх прыбраць не можам. Не дазволена. Дык што – няхай гніюць? – злаваўся Пётр Ляшук.
Едзем глядзець гэты лес разам з Пятром Мікалаевічам. І сапраўды, сярод лесу ляжаць старыя паваленыя дрэвы, а яшчэ стаяць вялікія сухія сосны, якія могуць не ўцалець, калі падзьме вялікі вецер.
Пачынаю шукаць патрэбныя тэлефоны і разбірацца, чый лес, чые дровы і гэтак далей. Галоўны ляснічы Турска-Лядзецкага лясніцтва Уладзімір Скулавец адказаў, што лес не іх, а належыць КСУП «Прыгарынскі-2012». Тэлефаную яго дырэктару Алегу Германовічу і чую ў адказ:
– Так, лес гэты наш і мы самі яго прыбяром. Ужо выслалі паведамленне Харомскаму сельвыканкаму і чакаем адказу ад Столінскай раённай інспекцыі прыродных рэсурсаў і аховы навакольнага асяроддзя. Калі збяром усе дакументы, вывезем усе паваленыя і спілуем аварыйныя дрэвы да 1 студзеня наступнага года. Пусцім іх на дровы і скарыстаем. У нас многа памяшканняў, якія абаграваюцца за кошт дроў. Навошта нам аддаваць іншым тое, што патрэбна самім?
Заўважаю і гурбы смецця, якія ляжаць паміж дрэў. Значыць, ёсць сярод мясцовых жыхароў і тыя, якія не прыбраць хочуць лес, а зрабіць з яго сметнік?
– А гэта нашы людзі вінаваты, – зга-джаецца Пётр Мікалаевіч, які ездзіў разам з намі. – Я вось ніколі не дазволю сабе нават паперку з-пад цукеркі выкінуць.
Гаспадара лесу мы знайшлі. А вось што тычыцца дроў, якія так хочуць набыць людзі, папрасілі даць адказ старшыню Харомскага сельвыканкама Анатоля Скрабца:
– Няхай звяртаюцца ў сельвыканкам. Мы складзём спісы і перададзім іх у лясніцтва. Адна праблема, што па дровы ў лес трэба ехаць самому гаспадару. Але ж дроў для насельніцтва ў Турска-Лядзецкім лясніцтве хапае і каштуюць яны нядорага.
Мяркую, адказ атрымаўся вычарпальны для ўсіх мужчын, якія прыйшлі да аддзялення сувязі. Жадаем вам цудоўнага новага года і добрага настрою. Ну і, каб дроў хапала ўсім.
Ганна МЕЛЬНІК
Фота
аўтара