У гэтым годзе тэрміны нарыхтоўкі кармоў у гаспадарках раёна значна зрушыліся з прычыны няўстойлівага надвор’я. Пасля красавіцкай засухі пачаліся праліўныя дажджы, якія, хоць і дапамаглі травам набрацца сілы, але значна перашкаджалі выхаду тэхнікі на палі.
Такая ж сітуацыя атрымалася і ў ААТ «Новая Прыпяць», таму нарыхтоўка кармоў пачалася толькі ў мінулую суботу. І зараз даводзіцца працаваць у паскораным тэмпе.
Разам з кіраўніком вытворчага ўчастка № 2 Аляксандрам Мазалём едзем глядзець, як ідуць справы.
Першая траншэя закладваецца на малочна-таварнай ферме «Лодыч». Тут на трамбоўцы на трох «Амкадорах» працуюць Сяргей Альгамец, Аляксей Альгамец і самы вопытны механізатар Пётр Андрусевіч.
Усяго ў гаспадарцы на адвозцы задзейнічана шэсць МАЗаў і дзесяць трактароў.
На адным з іх Аляксей Мамайка, якога мы сустрэлі ўжо на полі. Больш за два дзясяткі гадоў працуе ў гаспадарцы. Заўсёды з пачуццём гумару, таму, калі пытаю, чым жа падабаецца работа, з усмешкай адказвае: «Прырода навокал!».
– Трава ў гэтым годзе няважная, – бядуе кіраўнік участка Аляксандр Міхайлавіч. – Давялося доўга чакаць, каб яна вырасла. А зараз у некаторых месцах яе нельга скасіць – вязне тэхніка, таму на полі знаходзіцца «Амкадор», які пры неабходнасці выцягвае трактары. Ды і вялікія каляіны, што застаюцца пасля, прымушаюць хвалявацца, якім будзе другі ўкос. Таму спяшаемся хутчэй прыбраць поле.
Неўзабаве да нас падыходзіць касілка, якой кіруе Іван Ярмакевіч. У гаспадарцы, па яго словах, ён з 9-га класа. Механізатар вопытны, таму пакосы атрымліваюцца ювелірныя. Таксама косяць траву Мікалай Пінчук і Аляксей Кананчук.
Зборам траў у валкі і іх пераварочваннем займаецца Віктар Карабейнік. А ўслед за трактарам важна шпацыруюць буслы ў надзеі знайсці сабе ежу.
Прыбіраюць траву з палёў тры кормаўборачныя агрэгаты. На адным з іх – «Ягуары» – шосты сезон запар працуюць браты Васіль і Іван Слуцкія. Таксама адзначаюць, што ў гэтым годзе зямля вельмі мяккая і даводзіцца мінаць некаторыя ўчасткі, каб не праваліцца. Хлопцы ў гаспадарцы на вагу золата і ўжо не першы раз трапляюць на старонкі газеты як перадавікі.
Усяго ў ААТ «Новая Прыпяць» плануецца нарыхтаваць 15 тысяч тон сенажу, з якіх 2550 ужо ў траншэі. Пагалоўе жывёлы ў гаспадарцы пабольшала, таму патрэбнасць у кармах таксама ўзрасла. Застаецца спадзявацца, што надвор’е ў будучыні больш не будзе ставіць палкі ў колы сельскагаспадарчым работам і ўсё будзе ісці па плану.
Ганна МЕЛЬНІК
Фота аўтара
