Хутка ў поле

У сельскагаспадарчых арганізацыях раёна завяршаецца тэхнічны агляд сельгастэхнікі, якая ў хуткім часе будзе задзейнічана на вясенніх работах у полі. Усяго трактарны парк сельскагаспадарчых арганізацый і ААТ «Столінрайаграсэрвіс» складае 568 трактароў, з якіх 78 – энерганасычаныя, 104 пагрузчыкі і 272 прычэпы.

– Тэхнічны агляд праведзены ў 13 сельгасарганізацыях раёна з 16, – расказвае «НП» загадчык сектарам па нагляду за тэхнічным станам машын і абсталявання ўпраўлення па сельскай гаспадарцы і харчаванні Віталь Кавальскі. – Адзначу, што інжынерныя службы як заўсёды добрасумленна падыйшлі да падрыхтоўкі тэхнікі. Амаль усе трактары і пагрузчыкі адразу прайшлі тэхнічны агляд. Калі якая-небудзь тэхніка і не прайшла, то знаходзілася ў гэты час на рамонце. Уся тэхніка будзе агледжана да 10 сакавіка.
На адным з тэхнічных аглядаў пабываў і карэспандэнт газеты – у ААТ «Церабяжоў-Агра» на мехдвары роўнай шарэнгай сталі некалькі дзясяткаў трактароў, сярод якіх вылучаліся энерганасычаныя – «МТЗ-3022», «John Deer 8430» і «Massey Ferguson 8737 S».
– Па сваёй магутнасці і працаздольнасці гэтыя трактары амаль аднолькавыя, – гаворыць галоўны інжынер ААТ «Церабяжоў-Агра» Анатоль Андрыяшка. – Надзейныя. Самы магутны «немец», які, дарэчы, і самы стары – 16 гадоў, а самы новенькі «Майсей», як мы яго коратка называем, «Massey Ferguson» – у красавіку споўніцца чатыры гады. Беларус пасярэдзіне будзе.
– Усяго ў гаспадарцы пасля далучэння КСУП «Агра-Глінка» стала шэсць энерганасычаных трактароў, а парк павялічыўся ўдвая – да 49 адзінак. Большасць з гэтай тэхнікі ў хуткім часе вый-дуць у поле, каб араць глебу, культываваць і іншае. І вялікую ўвагу мы надаем падрыхтоўцы энерганасычанай тэхнікі, таму што на іх жалезных плячах вялікая адказнасць. Усё-такі араць абаротным васьмікорпусным плугам спрытней, чым звычайным чатырохкорпусным.
Аляксандр НІКІФАРЭНКА
Фота аўтара