Хроніка жніва-2020: Першыя «тысячнікі»

На 3 жніўня ў раёне ўбрана 14 тысяч гектараў збожавых і зернебабовых культур, што складае 70,3 працэнта. Намалочана амаль 55,9 тысячы тон збожжа пры сярэдняй ураджайнасці 39,7 ц/га.

Першыя «тысячнікі»

У пятніцу, 31 ліпеня, першых «тысячнікаў» жніва ў полі павіншаваў старшыня райвыканкама Рыгор Пратасавіцкі і старшыня райкама прафсаюза работнікаў аграпрамысловага комплексу Аляксандр Лузай.

Вызначыўся экіпаж у складзе Уладзіміра Шуканава і Дзмітрыя Багаткі з СВК «Фядорскі», якія на «Лексіёне-670» убралі 364,4 гектара і намалацілі 1317,5 тоны збожжа. Да таго ж у гаспадарцы існуе практыка, што за пэўным камбайнам замацаваны аўтамабіль. Дык вось Дзмітрый Багатка час ад часу падмяняе калегу за штурвалам магутнага камбайна, а ў асноўным адвозіць збожжа на дапрацоўку. Колькі намалацілі ўдвух – столькі Дзмітрый і перавёз. Гэтая лічба таксама найбольшая ў раёне.
– Камбайн у полі ўсяго другі сезон, – расказвае вопытны работнік жніва Уладзімір Шуканаў. – Працаваць на ім – адно задавальненне. Працуем прыкладна з 10-11 гадзін раніцы і да позняга вечара, каб як мага больш убраць за дзень, таму што плошчы вялікія. Ды і надвор’е спрыяе, таму настрой на гэтае жніво добры.
У КСУП «Відзіборскі» таксама ёсць экіпажы і вадзіцелі, якія размянялі першую тысячу тон намалочанага і перавезенага збожжа. Не першы сезон добра працуюць у полі камбайнеры Уладзімір Вярэніч і Канстанцін Малей. На сёння яны на камбайне КЗС-10 убралі 230 гектараў і намалацілі 1120 тон збожжа. А лепшым у гаспадарцы вадзіцелем на адвозцы збожжа з’яўляецца Аляксей Вярэніч, які на аўтамабілі МАЗ-5551 перавёз 1132 тоны збожжа. З гэтымі дасягненнямі работнікаў павіншаваў першы намеснік старшыні райвыканкама, начальнік упраўлення па сельскай гаспадарцы і харчаванні Мікалай Мароз. Таксама ў КСУП «Відзіборскі» адзначылі і самы вопытны экіпаж камбайнераў – братоў-пенсіянераў Юрыя і Ілью Неўдахаў, якія і зараз гатовыя якасна і хутка выканаць важную работу.
А ў суботу ранкам, першага жніўня, на мехдвары КУВП «Манькавічы» Аляксандр Лузай павіншаваў першых «тысячнікаў» гэтай гаспадаркі – камбайнераў Валерыя Хараўца і Анатоля Пачко, якія на.КЗС-1218 убралі 264,4 гектара і намалацілі 1130,1 тоны збожжа.