Гатоўнасць – амаль 100 працэнтаў

На календары – сярэдзіна лютага, і ўжо праз месяц, а то і раней на палях закіпіць праца. Да пачатку вясны ўсю тэхніку ў раёне, што задзейнічана на пасяўной, неабходна адрамантаваць. У КСУП «Беражное» ўжо сёння практычна 100-працэнтная гатоўнасць.

Галоўны інжынер сельгаспрадпрыемства Дзмітрый Гупала запрашае прайсціся па майстэрнях, дзе з раніцы да вечара кіпіць праца.
– Падрыхтоўка тэхнікі ў нас вядзецца з восені, – уводзіць у курс спраў суразмоўца. – У наяўнасці 40 трактароў, з якіх пяць – энерганасычаныя, 13 грузавых аўтамабіляў, пяць збожжаўборачных, чатыры корма- і два бульбаўборачныя камбайны. У першую чаргу прыводзім у парадак тую, што будзе ўдзельнічаць у пасяўной. У прыватнасці, энерганасычаныя трактары, камбінаваныя глебаапрацоўчыя і пасяўныя агрэгаты. Усё ідзе ў штатным рэжыме, дзе-нідзе паскорымся, некаторыя «хвасты» падцягнем і пачнём сеяць у поўнай баявой гатоўнасці.
КСУП «Беражное» – гаспадарка моцная і перспектыўная, таму абнаўленню машынна-трактарнага парку штогод надаецца належная ўвага. Так, у мінулым годзе набылі дыскатар, культыватар, апырсквальнік «Раса», адну касілку шырынёй дзевяць метраў і сельскагаспадарчы прычэп. У гэтым годзе гаспадарка плануе набыць два камбайны, два МАЗы, два трактары МТЗ і адну касілку. Амаль за ўсе агрэгаты грошы пералічаны – засталося толькі прывезці.
А тым часам работа ў майстэрні кіпіць – у адным баку па-сяброўску спрачаюцца вадзіцель Мікалай Паўловіч і аўтаэлектрык Уладзімір Цывіс, якія спрабуюць «удыхнуць святло» ў старэнькі «газончык».
– Коля, трымай за гэты провад, я табе кажу! Зараз паглядзім ці ёсць напруга, – кажа Уладзімір Цывіч, праз імгненні кантактная лямпачка запальваецца. – Вось, для такой старой тэхнікі – гэта самы надзейны і просты спосаб, каб «празваніць» электрыку.
Побач ля дыскатара завіхаўся механізатар Дзмітрый Пашкевіч, з якім знаёмы не адзін год. Дарэчы, у сельгаскааператыве Дзмітрый працуе амаль 20 гадоў.
– Не першы год я задзей-нічаны на пасяўной і ворыве, – з усмешкай гаворыць Дзмітрый, спрытна варочаючы гаечным ключом. – За мной замацаваны энерганасычаны трактар МТЗ, плуг і іншыя глебаапрацоўчыя агрэгаты. Першымі ў палі выйдуць агрэгаты па падкормцы азімых культур, а за імі следам – мы. З плугамі, культыватарамі, дыскамі і іншымі. І толькі потым сеялкі. Сам я з мясцовых, уладкаваўся сюды пасля службы ў арміі, маючы пасведчанне трактарыста, атрымаў яго яшчэ пры школьным КПК.
У Дзмітрыя за плячыма столькі гадоў практыкі, што можа паправіць любы агрэгат з заплюшчанымі вачыма.
– Гэта здаецца, што да пасяўной яшчэ далёка, але гэта падманлівае меркаванне, – кажа на развітанне механізатар. – Раз-два – і тэхніка ўжо ў полі. Працы на зямлі будзе шмат і радуе, што гэтай працы ў майстэрні засталося значна менш.
Пакуль Дзмітрый аглядаў дыскатар, да яго з пытаннем падыйшоў мясцовы токар Генадзь Хмарук і спытаў, што патрэбна вытачыць – ці для агрэгата, ці можа для трактара.
– Так, работы ў майстэрні заўсёды хапае, – кажа Генадзь і паглядае на нейкі чарцёж. – Вось аднаму трэба адрэстаўраваць паўвось для трактара, а другому – аднавіць разьбу ў вялізнай гайцы. Добра, што станок яшчэ не зусім стары і спраўляецца даволі хутка. Канешне, «блаху» на ім не падкуеш, а вось для сельгастэхнікі і нейкіх іншых дробязей – тое, што патрэбна.
Тым часам да майстэрні завітаў дырэктар прадпрыемства Віталь Яхнавец, які заўсёды трымае на асабістым кантролі ўсе этапы вытворчасці. Рамонт і абслугоўванне тэхнікі – на першым плане, асабліва перад пачаткам веснавых работ.
– Што тычыцца набыцця тэхнікі, то невырашальных пытанняў няма, – кажа Віталь Яхнавец. – У цэлым з бягучым рамонтам і абслугоўваннем спраўляемся сваімі сіламі, вельмі рэдка ўзнікае неабходнасць сэрвіснага ўмяшання. У нас дастаткова механізатараў, вялікая частка з вялікім стажам. Прыходзіць і моладзь. Старажылы на месцы навучаюць усяму: дабрасумленнаму стаўленню да працы, выручцы і калектыўнай адказнасці, на якой трымаецца поспех гаспадаркі.
Хутка тэхніка выйдзе ў поле – у гэтым годзе для яравой сяўбы ў КСУП «Беражное» выдзелена амаль 1500 гектараў. А пакуль сеяць – трэба правесці хімпраполку і падкормку таксама каля 1500 гектараў пасеваў. Ад таго, як своечасова і якасна будуць выкананы неабходныя рэгламентныя работы, у далейшым будуць залежыць якасць збожжа і ўраджайнасць.

У сераду, 15 лютага, ў КСУП «Беражное» прайшоў тэхнічны агляд тэхнікі, вынікамі якога падзяліўся намеснік начальніка ўпраўлення па сельскай гаспадарцы-загадчык сектара механізацыі Валерый Багатка:
– У гэтыя дні ў сельгас-арганізацыях раёна актыўна праходзяць мерапрыемствы па правядзенні тэхнічнага агляду сельгастэхнікі, якое праводзіць інспекцыя дзяржтэхнагляду. З 16 арганізацый мы ўжо наведалі сем. Працэнт праходжання дзяржаўнага тэхнічнага агляду складае 99 працэнтаў. Варта адзначыць, што кіраўнікі, супрацоўнікі інжынернай службы і механізатары падышлі да гэтага важнага пытання з вялікай адказнасцю, сур’ёзных недахопаў і заўваг не выяўляліся, а дробныя недахопы ўхіляліся на месцы ў працэсе праходжання тэхагляду, альбо будуць ліквідаваны ў самыя кароткія тэрміны.

Каментарый спецыяліста
Загадчык сектарам па наглядзе за тэхнічным станам машын і абсталявання райсельгасхарчу Віталь Кавальскі:
– Усяго ў сельскагаспадарчых арганізацыях раёна 1 487 адзінак сельскагаспадарчай тэхнікі – гэта трактары, прычэпы да іх, пагрузчыкі, збожжаўборачныя і кормаўборачныя камбайны. Зараз у страі – 1 457 адзінак тэхнікі, што складае каля 98 працэнтаў. Самая вялікая гатоўнасць у энерганасычаных трактароў, якіх у нас 78 адзінак – 99 працэнтаў, не адстаюць і глебаапрацоўчыя агрэгаты — 97 працэнтаў. Але расслабляцца не варта: з пачаткам пасяўной рахунак пойдзе на дні. Кожны, хто працуе на зямлі, разумее, што ад спраўнасці тэхнікі шмат у чым залежыць будучы ўраджай. У гэтым упэўнены і кіраўнікі, і галоўныя інжынеры гаспадарак, бо яны імкнуцца для сябе.

Аляксандр НІКІФАРЭНКА
Фота аўтара