ФОТАРЭПАРТАЖ: Аграрыі – залаты фонд Беларусі

На Брэстчыне стала традыцыяй праводзіць абласны фестываль-кірмаш «Дажынкі» ў невялікіх населеных пунктах рэгіёна.

Рыхтуючыся да свята, вёскі значна паляпшаюць інфраструктуру, ўмовы жыцця.

Аграгарадок Дзівін Кобрынскага раёна ў мінулую суботу вітаў удзельнікаў урачыстага мерапрыемства. Добраўпарадкаваныя вуліцы, новы знешні выгляд будынкаў устаноў і арганізацый, адрамантаваны дзіцячы садок, Дом культуры. Зроблена мадэрнізацыя бальніцы і школы. На ўсё гэта з розных крыніц выдаткавана больш за 12 мільёнаў рублёў.

Са святочнай сцэны лепшых аграрыяў вобласці, гасцей і жыхароў вітаў старшыня праўлення Белкаапсаюза, упаўнаважаны кіраўніка дзяржавы па Брэсцкай вобласці Валерый Іваноў. Ён таксама зачытаў вітальны адрас працаўнікам вобласці ад Прэзідэнта Беларусі Аляксандра Лукашэнкі. «Вы ўклалі ў хлебную ніву не толькі прафесіяналізм, цярпенне, але і ўсю сваю душу. Таму зямля аддзячыла багатым ураджаем. Уклад у рэспубліканскі каравай збожжавых склаў больш за 1,3 мільёна тон. Гэта вынік высокай арганізацыі працэсу, захавання тэхналогій, адказнага стаўлення да справы кожнага вяскоўца Брэстчыны», – гучыць у віншаванні.

Старшыня Брэсцкага аблвыканкама Анатоль Ліс, перш чым уручыць аграрыям заслужаныя ўзнагароды, адзначыў, што на ўборцы было задзейнічана 1400 камбайнаў, больш за дзве тысячы грузавых аўтамабіляў, 410 збожжасушыльных комплексаў. Значна дапамагла і дзяржава – па распараджэнні Кіраўніка краіны быў выдаткаваны таварны крэдыт амаль на 14 тысяч тон дызельнага паліва. Агульны валавы збор збожжа склаў адзін мільён 350 тысяч тон – гэта на 12 працэнтаў больш, чым у мінулым годзе. На Брэстчыне атрымана самая высокая за бягучую пяцігодку ўраджайнасць – 39,6 цэнтнера з гектара. Гэта больш, чым у 2019 годзе на чатыры цэнтнеры.

Сёлетнія пераможцы жніва – Іванаўскі, Пружанскі і Камянецкі раёны.

Граматы, каштоўныя падарункі атрымалі і прадстаўнікі аграрнага сектара Століншчыны. Сярод вадзіцеляў на адвозцы збожжа другое месца ў Мікалая Калба з КСУП «Рухчанскі», першым сярод маладых вадзіцеляў стаў Генадзь Яхнавец з КУВП «Манькавічы».

За шматгадовую працу ў органах дзяржкіравання і значны асабісты ўклад у развіццё аграпрамысловага комплексу Брэсцкай вобласці Ганаровай граматай Савета Міністраў узнагароджаны старшыня Столінскага райвыканкама Рыгор Пратасавіцкі.

Пераможцам рэспубліканскага агляду-конкурсу «Землекарыстанне высокай культуры земляробства, добраўпарадкаванне машынных двароў, жывёлагадоўчых фермаў і комплексаў» стаў СВК «Фядорскі» (старшыня Рыгор Дзямко).

За эфектыўную эксплуатацыю высокавытворчай тэхнікі холдынгу «Гомсельмаш» і высокі паказчык намалоту зерня ноутбукі атрымалі трактарысты-машыністы з ААТ «Палеская ніва» Васіль Зелянкевіч і Іван Гушча.

Таксама прыемна адзначыць, што ў святочнай канцэртнай праграме прымаў удзел заслужаны аматарскі калектыў Рэспублікі Беларусь «Выцінанка».

Алена КЛІМУШКА

Фота аўтара