Ва ўстанове адукацыі «Рэспубліканскі цэнтр экалогіі і краязнаўства» ў фармаце навукова-практычнай канферэнцыі падведзены вынікі заключнага этапу рэспубліканскага конкурсу навуковых даследчых краязнаўчых работ вучняў.
На рэспубліканскі этап было накіравана абласнымі журы з усіх абласцей і горада Мінска 221 работа. Ад Брэсцкай вобласці для ўдзелу ў секцыі «Геаграфічнае краязнаўства» – восем работ, сярод якіх даследчая работа вучаніцы 11 класа Дубайскага ВПК яслі-сад – сярэдняя школа Ганны Кудласевіч. Работа на абласным этапе была адзначана дыпломам ІІІ ступені.
Ганна Кудласевіч і навуковы кіраўнік, настаўнік геаграфіі Мікалай Іванавіч Дзямко былі запрошаны на навукова-практычную канферэнцыю ва ўстанову адукацыі «Рэспубліканскі цэнтр экалогіі і краязнаўства». Рэспубліканскае журы, у склад якога ўваходзілі прадстаўнікі Нацыянальнай акадэміі навук Беларусі, прафесарска-выкладчыцкага складу вядучых профільных ВНУ краіны ацэньвала абарону кожным аўтарам навуковай работы ў фармаце яе прадстаўлення-прэзентацыі і гутаркі па змесце.
Па выніках удзелу ў навукова-практычнай канферэнцыі Ганна Кудласевіч узнагароджана Дыпломам ІІ ступені Міністэрства адукацыі Рэспублікі Беларусь і каштоўным падарункам.
Прадметам даследавання навуковай работы з’яўляецца Дубайскі канал – унікальны водна-гаспадарчы аб’ект заходне-цэнтральнай часткі Столінскага раёна. Канал пракладзены па рэкамендацыях Заходняй экспедыцыі (1874 – 1897) па асушэнні Палесся пад кіраўніцтвам генерала І. Жылінскага. Асноўнае прызначэнне канала як магістральнага меліярацыйнага – адвод лішкавых вод з тэрыторыі заказніка мясцовага значэння «Марочна», часткі сельскагаспадарчых угоддзяў Століншчыны (ААТ «Церабяжоў-Агра», КСУП «Агра-Глінка», КСУП «Відіборскі»). Былі даследаваны гісторыя стварэння канала, яго значэнне, экалагічныя праблемы, распрацаваны рэкамендацыі па падтрыманні аптымальнага стану канала.
Віншуем Ганну Кудласевіч з высокім вынікам і зычым ёй далейшых поспехаў!
Мікалай
ДЗЯМКО
