25 ВЕРАСНЯ – ДЗЕНЬ МАШЫНАБУДАЎНІКА: Стаўка зроблена!

На тэрыторыі нашага раёна прафесійнае свята машынабудаўніка адзначаюць работнікі Давыд-Гарадоцкага электрамеханічнага завода, заснаванага ў 1976 годзе. У савецкія часы прадпрыемства працавала амаль для ўсіх былых рэспублік, але сёння павінна разлічваць толькі на свае сілы.

У самыя цяжкія часы, якія, дзякуй Богу, завяршыліся (прынамсі на гэта тут спадзяюцца), хтосьці прадказваў банкруцтва, закрыццё прадпрыемства, а хтосьці быў больш аптымістычным. Як бы то ні было, але сёння прадпрыемства працуе, хоць і не ў такім велізарным штаце і не ў такіх аб’ёмах.

Напярэдадні прафесійнага свята мы пагутарылі з дырэктарам завода Сяргеем Шылам.

– Выратаванне тапельца – справа рук самога тапельца, – кажа Сяргей Пятровіч. – Ніхто за нас не прыйдзе і не зробіць так, каб было ўсё добра. Таму мы робім стаўку на праект, які пачалі распрацоўваць крыху больш за год таму – гэта праект па вытворчасці кантэйнераў для цвёрдых камунальных і бытавых адходаў з пластыку аб’ёмам 120 літраў.

Ад шэрагу вырабляемых на заводзе пазіцый, якія на сёння  неактуальныя і нерэнтабельныя, мы адмовіліся. Пакуль спецыялізуемся на вытворчасці прадукцыі электратэхнічнага прызначэння. Гэта пускавыя і ахоўныя рэле для кампрэсараў халадзільных установак, клемныя калодкі і вузлы, шчотачныя вузлы, відэльцы апрасаваныя (сеткавыя шнуры з падвойным зазямляльным кантактам (еўравілка), рад прадукцыі з пластмасы і іншае. Асноўнымі спажыўцамі электратэхнічнай прадукцыі завода з’яўляюцца ЗАТ «Атлант», яго філіял «Баранавіцкі станкабудаўнічы завод», на долю якіх прыходзіцца каля 85 працэнтаў выпускаемай прадукцыі, а таксама СП ААТ «Брэстгазаапарат» і ЗАТ «Гефест». Таксама вырабляем па заказе ААТ «Рудзенск» святлотэхнічную прадукцыю для грузавых аўтамабіляў МАЗ, КамАЗ, ГАЗель, а таксама для сельгастэхнікі і іншых. Гэта фары пярэднія і заднія, ліхтары, святлоадбівальнікі, паказальнікі паваротаў і многае іншае. Таксама працуем з нашымі фермерамі – вырабляем патрэбную ім прадукцыю з пластмасы. Усяго выпускаемых пазіцый на заводзе сёння больш за 90.

– Раскажыце больш аб праекце па выпуску кантэйнераў. Калі чакаць першую партыю?

– Ініцыятыва па праекце ўзнікла з цягам часу. Не так даўно пластыкавыя кантэйнеры для збору цвёрдых камунальных адходаў пачалі з’яўляцца ў Століне – іх раздавала КУШВП «Столінская ЖКГ». Па два кантэйнеры – чорнага і жоўтага колераў. Міністэрства жыллёва-камунальнай гаспадаркі прыйшло да высновы, што ў хуткім часе спатрэбіцца абсталяваць кантэйнерамі каля 1,7 млн падворкаў па ўсёй краіне. Гэта калі лічыць толькі падворкі. А што, школам кантэйнеры не патрэбныя? Бальніцам, на прадпрыемстве? Думаю, што патрэбныя кантэйнеры таксама.

– Таму ў жніўні мінулага года мы заключылі з Беларускім інавацыйным фондам дагавор, прайшлі ўсе стадыі ўзгадненняў нашага венчурнага (рызыковага, – аўт.) праекта. Рэалізацыя гэтага праекта ацэнена ў 2,1 млн рублёў. У асноўным сродкі выдзяляюцца  з Беларускага інавацыйнага фонду.

– На прадпрыемстве мы падрыхтавалі ў адным з вытворчых цэхаў пляцоўку, зрабілі неабходны падмурак, таму што новая машына, якую вырабляе  Баранавіцкі станкабудаўнічы завод для вытворчасці кантэйнераў, будзе важыць 68 тон! Трэба адзначыць, што для нашых сяброў з Баранавічаў праектаванне і вытворчасць гэтай машыны таксама ў навінку. У хуткім часе ўсё будзе прывезена, зманціравана і адбу-дзецца першы пуск устаноўкі. Плануецца, што гэта адбудзецца ў лістападзе гэтага года. Праектная магутнасць – 50 тысяч кантэйнераў у год.

Мы спадзяёмся, што справы на прадпрыемстве палепшацца. Мы і так, нягледзячы на розныя санкцыі, з пачатку года працуем без страт. А новая машына дасць дадатковы імпульс для развіцця завода. Стаўка зроблена!

Аляксандр

 НІКІФАРЭНКА

Фота

аўтара