Вынікі-2018. Дробязяў не бывае, калі працаваць з душою

Культработнікі падвялі вынікі за 2018 год і паставілі задачы на год сёлетні.
У сваім дакладзе начальнік аддзела культуры Васіль Заруба спыніўся на рабоце ўсіх падраздзяленняў галіны – ад фінансава-эканамічнай дзейнасці, матэрыяльнага забеспячэння да творчых дасягненняў. У ліку таго, што выклікае заклапочанасць кіраўніцтва, Васіль Андрэевіч назваў кадравую праблему, праектную дзейнасць, пытанні добраўпарадкавання тэрыторый і працоўнай дысцыпліны.
Дакладчыка дапоўнілі кіраўнікі падраздзяленняў. Дырэктар раённай клубнай сістэмы Алена Дубойская таксама гаварыла пра недахоп кваліфікаваных кадраў. Дырэктар Рэчыцкай дзіцячай школы мастацтваў Аляксандр Велясніцкі звярнуўся да прысутных з просьбай дапамагчы знайсці харэографа, каб навучаць дзяцей танцам. Галоўны спецыяліст па ахове гісторыка-культурнай спадчыны Аляксандр Марушка нагадаў, што сёлета будуць адрамантаваны помнікі загінуўшым у Радчыцку, Стахаве, Сямігосцічах, перанясуць у Талмачаве. Статус воінскіх будзе нададзены пахаванням у Гарадной і Альманах. Сваёй работай падзяліліся дырэктар раённай бібліятэчнай сістэмы Іван Ляшкевіч і дырэктар Цэнтра ганчарства Васіль Казачок.
У 2019 годзе плануецца завяршэнне капітальнага рамонту будынка для школы мастацтваў у г. Століне, Сямігосціцкага СДК, бягучыя рамонты Лядзецкага СДК, Цэнтра драўлянай скульптуры ў в. Цераблічы. Будзе працягнута аптымізацыя сеткі ўстаноў культуры. Сярод асноўных плануемых мерапрыемстваў – святочныя ўрачыстасці да 75-годдзя вызвалення Беларусі ад нямецка-фашысцкіх захопнікаў, удзел у святкаванні 1000-годдзя горада Брэста, даты чырвонага календара, прафесійныя і традыцыйныя народныя святы.
У рабоце сходу прыняў удзел і выступіў намеснік старшыні раённага выканаўчага камітэта Сяргей Сідарэвіч. Ён падзякаваў культработнікам за працу, за душэўнасць, якой яны напаўняюць кожнае сваё мерапрыемства. У ліку пастаўленых задач назваў падрыхтоўку яшчэ аднаго творчага калектыву на званне “Заслужаны амтарскі калектыў Рэспублікі Беларусь” – танцавальнага. Прапанаваў больш увагі надаваць рабоце з падлеткамі, якія стаяць на ўліку ў інспекцыі па справах непаўналетніх, не быць у баку ад усяго, што адбываецца ў населеным пункце, вытрымліваць рэжым работы, сачыць за санітарным станам сваіх устаноў, бо дробязяў у рабоце не бывае.
Па традыцыі за добрасумленную працу, высокі прафесіяналізм заахвочаны шэраг работнікаў.
Аб’яўлена падзяка начальніка ўпраўлення культуры Брэсцкага аблвыканкама намесніку дырэктара Столінскай раённай клубнай сістэмы Ніне Лісавец за ўклад у распрацоўку і рэалізацыю праграмы тэрытарыяльнага супрацоўніцтва краін Усходняга партнёрства.
Граматамі аддзела культуры і прэміямі ўзнагароджаны Столінскі гарадскі (дырэктар Кацярына Сакалова) і Рэчыцкі гарадскі дамы культуры (дырэктар Зоя Пашкевіч), Альманскі сельскі дом культуры (дырэктар Мікалай Дзенісовіч), Алена Разановіч – бібліятэкар Столінскай раённай дзіцячай бібліятэкі, Ніна Вайцяхоўская – настаўнік па класе фартэпіяна Столінскай дзіцячай школы мастацтваў, Валянціна Яхнавец – галоўны бухгалтар цэнтралізаванай бухгалтэрыі.
На Дошку гонару аддзела культуры занесены кіраўнік народнага ансамбля танца «Рэха» Алена Волкава, Ніна Вайцяхоўская, Ніна Лісавец, Алена Разановіч, Мікалай Дзенісовіч, дырэктар Давыд-Гарадоцкай школы мастацтваў Вадзім Козел.
Галіна ГАШЧУК
Фота аўтара