Другі год запар лепшую ўраджайнасць дэманструе УП «Рубельскі». Калі летась тут з кожнага гектара ў сярэднім атрымлівалі па 56,5 цэнтнера збожжа, то ў гэтым годзе яшчэ крыху нарасцілі – 57,3 цэнтнера.
Па выніках жніва-2020 гэтае прадпрыемства стала другім у раённым спаборніцтве. Аб дасягнутых поспехах і планах на будучыню «НП» расказаў галоўны аграном унітарнага прадпрыемства Васіль ГЛЯД:
– Цяперашняя ўраджайнасць – рэкорд для нас. Ды і агульны намалот 5,27 тысячы тон – таксама рэкордны. Дадаць шмат плошчаў пад збожжавыя мы не можам, таму павышаем тэхналогію вырошчвання. Апошнія некалькі гадоў выкарыстоўваем для сяўбы якасны матэрыял, які і дае такія высокія паказчыкі. Глядзіце, у гэтым годзе на некаторых участках пшаніца так урадзіла і давала да 70-80 цэнтнераў і больш з кожнага гектара. Раней мы нават і думаць не маглі аб такой ураджайнасці.
– Але такія высокія ўраджаі былі б марнымі, калі б мы не пабудавалі новы збожжасушыльны комплекс «Амкадор», які за суткі можа перапрацаваць 400-450 тон збожжа. Гэта вялікая моц, ён нам быў вельмі патрэбен і з’явіўся ў гэтым годзе. Падчас жніва на ім працавалі ўсяго два чалавекі Аляксандр і Уладзімір Пашкевічы, якія перапрацавалі каля 4,5 тысячы тон. Цяпер мы нацэлены на большы ўраджай і бачым, што гэта нам па сіле. Маючы такі комплекс, можна пера-адольваць шэсць і болей тысяч тон збожжа.
– Такога ўраджаю магло і не быць, каб не новыя тэхналогіі. Па-першае, да нас прыйшлі новыя сеялкі, увесь працэс аўтаматызаваны па навігацыі; па-другое, своечасовыя мінеральныя падкормкі, апрацоўкі; па трэцяе, людзі сталі больш адказнымі і стараннымі. Адсюль і рост вытворчасці. Калі летась мы атрымалі крыху менш за чатыры тысячы тон збожжа, то прырост у 1,3 тысячы тон уражлівы. Спа-дзяёмся, што ў наступным годзе мы таксама атрымаем ураджайнасць на адпаведным узроўні.
Аляксандр
НІКІФАРЭНКА
Фота аўтара
