13 верасня тысячы дзяцей па ўсёй краіне былі прыняты ў піянеры.
У гэты дзень у 1990 го-дзе X Рэспубліканскі злёт піянераў прыняў рашэнне аб самастойнасці Беларускай рэспубліканскай піянерскай арганізацыі як суб’екта Міжнароднага саюза дзіцячых арганізацый.
Многае змянілася за гэты час, але традыцыі БРПА засталіся ранейшымі: любіць сваю Радзіму, берагчы прыроду, паважаць старэйшых, быць прыкладам для малодшых.
У Альшанскай СШ № 1 прымаюць у рады піянераў 16 верасня – напярэдадні самага маладога рэспубліканскага свята – Дня народнага адзінства. Як расказала педагог-арганізатар, старшая піянерская важатая Аляксандра Крупкевіч, у гэты дзень стануць піянерамі вучні ва ўзросце ад 10 да 14 гадоў.
– Аляксандра Рыгораўна, якія яны – сучасныя піянеры?
– Такія ж, як і іх папярэднікі – адказныя, добрасумленныя, гатовыя прыйсці на дапамогу ў любы момант, не баяцца цяжкасцяў і, канечне, прымаюць актыўны ўдзел у жыцці школы. Адрозніваюцца сучасныя піянеры хіба што толькі большай мабільнасцю і аператыўнасцю. Праводзяцца конкурсы ў новых фарматах, якія блізкія сучасным дзецям. Вось, напрыклад, Аляксандра Сімановіч у гэтым годзе стала пераможцай раённага этапу ІІ рэспубліканскага фестывалю-конкурсу «Аганёк запрашае сяброў» у намінацыі «Гістарычная памяць: Трэнд-Tiktoka: ура-патрыятызм». У сваім відэакліпе яна расказала пра подзвіг беларускага народа ў Вялікай Айчыннай вайне. А старшыня савета піянерскай дружыны Аляксандра Скрабец стала пераможцай раённага этапу VII рэспубліканскага агляду-конкурсу «Лідар года-2022» у намінацыі «Піянер года». Ёй патрэбна было падрыхтаваць Tiktok-прэзентацыю пра сябе і свае захапленні, відэавізітку з групай падтрымкі і прадэманстраваць свой талент.
– Ці многа часу спатрэбілася на падрыхтоўку? – пытаю дзяўчат.
– Давялося папрацаваць, – адказваюць абедзве Аляксандры. – Калі прыйшлі вынікі, зразумела, былі ўзрадаваны, з’явілася яшчэ большая матывацыя. Вельмі спадабалася ўдзельнічаць у квізе – інтэлектуальна-забаўляльнай гульні ў стылі «Што? Дзе? Калі?».
Не адстаюць ад дзяўчат і іншыя члены піянерскай дружыны. Сцяфан Пархоменка марыць стаць архітэктарам і пабудаваць у Альшанах шэдэўр архітэктурнага мастацтва. Мікіта Баган хоча быць праграмістам. Валерыя Андрусевіч – ветэрынарным урачом, бо любіць жывёл. Аляксандра Скрабец – урачом-касметолагам, а Аляксандра Сімановіч – юрыстам і адстойваць праўду. Не вызначылася з будучай прафесіяй толькі Аляксандра Бабій, таму пакуль аднолькава налягае на ўсе школьныя прадметы.
Гэтыя дзеці абавязкова знойдуць сябе ў жыцці, паколькі выхаваны на правільных каштоўнасцях і арыенцірах. І піянерыя ў гэтым сыграла важную ролю.
Ганна МЕЛЬНІК
Фота аўтара
