Калі працаваць з душой – усё атрымаецца

Добра працаваць на зямлі можа толькі той, хто шчыра любіць яе. Вядучы аграном вытворчага ўчастка “Велямічы” ААТ “Палеская ніва” Мікалай Кананчук ужо 21 год працуе ў гаспадарцы.
Такую даволі адказную і складаную, але важную, патрэбную прафесію Мікалай Ільіч выбраў па парадзе старэйшага брата. Ды і сам адчуваў, што гэта яго прызванне.
Мікалай з дзяцінства быў добра знаёмы з работай на зямлі. Вырас у сям’і, дзе з малых гадоў выхоўвалі ў працы, павазе да старэйшых, асаблівым стаўленні да навучання. Коля добра вучыўся ў школе. Без асаблівых цяжкасцяў паступіў у Гродзенскі сельскагаспадарчы інстытут, дзе атрымаў спецыяльнасць агранома. Пасля вучобы год служыў у арміі. А ў студзені 1997 года Мікалай Ільіч пачаў працоўную дзейнасць у калгасе “За Радзіму” пры тагачасным кіраўніку Фёдару Зіноўчыку.
– Так склаўся лёс, што пасля вучобы вярнуўся працаваць у родную вёску, – кажа суразмоўнік. – І ніколькі не шкадую.
За два дзясяткі гадоў аграном атрымаў каласальны вопыт. Першыя гады пад кіраўніцтвам старэйшых калег асвойваў агранамічную навуку. Бо адна справа – тэарэтычныя веды, якія напісаны ў даведніках. На практыцы ўсё складваецца крыху па-іншаму. І часткова Мікалай Ільіч згодны з тым, што агранамію трэба вывучаць непасрэдна ў гаспадарцы, на полі, каб ўвачавідкі знаёміцца з тонкасцямі і асаблівасцямі аграрнай навукі.
– Часта кажу студэнтам, якія прыходзяць на практыку: “Не саромейцеся і не бойцеся задаваць пытанні”, – гаворыць аграном. – Заўсёды падкажу.
Працоўны дзень у агранома пачынаецца а восьмай гадзіне, заканчваецца пасля 20.00 гадзін вечара. Зранку на планёрцы абмяркоўваюцца планы на дзень: якія віды работ неабходна зрабіць, якую тэхніку дзе задзейнічаць…
Многія працэсы ў гаспадарцы – закупка насення, пасяўная кампанія, апрацоўка палёў, абарона раслін ад розных хвароб, насякомых і пустазелля, унясенне ўгнаенняў, уборка ўраджаю – праводзяцца пры непасрэдным удзеле і пад пільнай увагай агранома.
Але для агранома важна таксама не толькі добра валодаць навыкамі апрацоўкі зямлі, а і ўмець наладжваць добрыя адносіны з механізатарамі, работнікамі гаспадаркі. Мікалай Ільіч дзеліцца, што ўзаемапаразуменне і добрае стаўленне да падначаленых – адзін з галоўных прынцыпаў, якіх ён прытрымліваецца ў рабоце. Не магу не падтрымаць гэтыя словы, бо асабіста неаднаразова чула ад вяскоўцаў добрыя водгукі на адрас Мікалая Ільіча.
Цікаўлюся ў Мікалая Кананчука, без якіх прафесійных якасцяў не можа абысціся спецыяліст сельскагаспадарчай вытворчасці. Ён задумваецца на некалькі імгненняў і адказвае: “Калі казаць коратка: без мэтанакіраванасці! Дакладна вызначаная мэта спрашчае работу. А ў гэтае паняцце ўваходзіць і шчырае жаданне, павага да сваёй справы”.
– На добры ўраджай уплывае многа фактараў, – заўважае аграном. – Калі працаваць аддана, як кажуць, з душой – усё атрымаецца. Маюць значэнне і ўмовы надвор’я, безумоўна.
У вольны час мужчына займаецца на асабістым падвор’і. Любіць ўсемагчымыя крыжаванкі і сканворды. Не адмовіцца ад паездкі ў лес.
Сям’я Мікалая Ільіча – жонка Іна і трое дзяцей. Жонка таксама працуе ў сельскай гаспадарцы: яна брыгадзір малочнатаварнага комплексу № 3 у Велямічах. Старэйшы сын Андрэй – студэнт Навагрудскага аграрнага каледжа. Дачка Яна – навучэнка 11 класа. Мае планы звязаць жыццё з банкаўскай справай. Малодшая Юля – навучэнка 7 класа. Як клапатлівы бацька, ён надае шмат увагі навучанню, бывае і дамашняе заданне правярае ў дачок.
Працоўны дзень работніка сельскай гаспадаркі – насычаны, а спіс спраў іншы раз не ўдаецца выканаць.
Пасля гутаркі карэспандэнт разам з Мікалаем Ільічом адправіліся непасрэдна на поле, дзе зараз ідзе ўнясенне арганічных угнаенняў. Механізатары Аляксей Мароз, Аляксандр Слуцкі і Вячаслаў Шпакоўскі былі задзейнічаны на гэтай рабоце. Аграном даў пэўныя ўказанні і рэкамендацыі работнікам гаспадаркі.
Мужчына займае актыўную жыццёвую пазіцыю – член камісіі на выбарах. Да таго ж 17 лістапада (во супадзенне!) будзе адзначаць дзень нараджэння. Жадаю моцнага здароўя, дабрабыту і поспехаў ва ўсіх справах!
Святлана
МАРОЗ
Фота аўтара