18 студзеня ў Нацыянальнай бібліятэцы Беларусі адбылася ўрачыстая цырымонія ўзнагароджання пераможцаў літаратурнага конкурсу «Беларускі салавей», прымеркаванага да 135-годдзя з дня нараджэння Змітрака Бядулі.
Конкурс быў ініцыяваны восенню 2021 года Нацыянальнай бібліятэкай Беларусі і ладзіўся ў рамках праекта «На хвалі часу, у плыні жыцця» пры ўдзеле газеты «Літаратура і мастацтва», «Настаўніцкай газеты», часопіса «Бярозка», Нацыянальнага акадэмічнага Вялікага тэатра оперы і балета Рэспублікі Беларусь, Беларускага дзяржаўнага акадэмічнага тэатра юнага гледача, канала «Культура» Беларускага радыё і радыёстанцыі «Цэнтр FM». У конкурсе прынялі ўдзел 827 чалавек.
Сярод пераможцаў былі і прадстаўнікі нашага раёна.
Трэцяе месца ва ўзроставай катэгорыі 10-13 гадоў заняла вучаніца СШ № 2 р. п. Рэчыца Дар’я Фурман. Яна прадставіла на суд журы эсэ «Новая старая казка» («Сярэбраная табакерка»), якое рыхтавала пад кіраўніцтвам педагога Ларысы Буйніч.
А вучаніца 11 класа Сямігосціцкай сярэдняй школы Крысціна Літвін узнагароджана дыпломам за даследчую работу «Сінтаксічныя фігуры як сродак экспрэсіўнага сінтаксісу ў аповесці Змітрака Бядулі «Салавей». Кіраўнік работы – настаўніца беларускай і рускай мовы Яніна Арлянін.
Ганаровым госцем цырымоніі стаў сын Змітрака Бядулі Яфім Плаўнік. Ён шчыра падтрымліваў творчую ініцыятыву, сачыў за ёй, знаёміўся з працамі ўдзельнікаў.
Усіх лаўрэатаў чакалі памятныя падарункі і віншаванні ад інфармацыйных партнёраў конкурсу.
Сваімі ўражаннямі падзялілася Крысціна Літвін:
– Для мяне запрашэнне на фэст такого узроўню – вялікая радасць. Прызнаюся, мы з настаўніцай Янінай Фёдараўнай да апошняга не ведалі, што наша даследчая работа будзе так высока ацэнена. Да яе мы рыхтаваліся некалькі тыдняў. Прыемным сюрпрызам стала знаёмства з Яфімам Плаўнікам. Дагэтуль я некалькі разоў была ў Нацыянальнай бібліятэцы, але ў якасці пераможцы конкурсу ўпершыню. Буду імкнуцца і далей трымаць высокую планку і займацца даследчай дзейнасцю.
Віншуем пераможцаў конкурсу і жадаем новых дасягненняў!
Падрыхтавала
Ганна МЕЛЬНІК
