Пасля святкавання Новага года настае самая таямнічая, чароўная і загадкавая пара народнага календара – Святкі. Гэта 12 святочных дзён, якія ўключаюць зімовыя святы Ражджаство, Стары Новы год і заканчваюцца Вадохрышчам.
Гэта час добрых спраў, калі прынята весяліцца, хадзіць у госці і калядаваць.
У Столінскім раённым краязнаўчым музеі вялікую ўвагу надаюць народным звычаям і абрадам і правялі Вадохрышчанскі вечар з элементамі народных Святак. Удзельнікамі вечарыны сталі супрацоўнікі краязнаўчага музея, дзіцячай школы мастацтваў, клубныя работнікі, аматары і прыхільнікі народнай культуры. Усіх запрасілі ў нядаўна адчыненую рэзідэнцыю Дзеда Мароза, дзе ў цёплай, утульнай атмасферы прайшло святочнае дзейства. Чароўнасці надавала імітацыя снегу на падаконніках, яловыя галінкі, імправізаваны агонь у каміне.
Вядучыя вечара вядучы спецыяліст па захаванні гісторыка-культурнай спадчыны Аляксандр Марушка і аўтар сцэнарыя малодшы навуковы супрацоўнік музея Святлана Сідарэвіч нагадалі гасцям пра звычаі Святак, правялі гульні-загадкі.
Навучэнцы дзіцячай школы мастацтваў выканалі танцы і песні зімовай і каляднай тэматыкі, ігралі на музычных інструментах, арганізавалі батлеечны міні-спектакль пра нараджэнне Іісуса Хрыста.
Канцэртныя нумары выканалі танцавальны гурт пад кіраўніцтвам Таццяны Старасцінай, хор пад кіраўніцтвам Дзіяны Гунько.
Чыталі вершы Валерыя Кухарэнка і Дар’я Федарук, спявалі і ўдзельнічалі ў батлейцы Ганна Бруцкая і Ліяна Бандарчук(настаўнік Ірына Шульжык). Ігру на музычных інструментах прадэманстравалі Антон Радзько – на баяне, Дзіяна Літвінка – на скрыпцы і Цімафей Неўдах – на гітары (настаўнік Іван Жакун), Паліна Буян – на цымбалах (настаўнік Марына Галабурда).
Па народным звычаі, як і належыць у святачныя дні, у гасцёўню завіталі калядоўшчыкі – у масках, з музычнымі інструментамі і песнямі. Як звычайна, адзін з персанажаў – цыганка, якая варажыла гасцям…
За салодкім сталом госці дзяліліся дзіцячымі ўспамінамі пра свята Каляд, яркімі ўражаннямі ад калядавання, якія засталіся ў памяці на ўсё жыццё.
Напрыканцы вечара госці атрымалі ад імправізаваных гаспадара і гаспадыні сімвал Вадохрышча – слоічкі з асвячонай вадой.
Як адзначыла Святлана Мікалаеўна, у планах установы правесці цыкл мерапрыемстваў па адраджэнні святаў і традыцый народнага календара.
Бліжэйшае – Масленічныя гулянні, якія будуць наладжаны ў парку «Манькавічы» з 28 лютага па 6 сакавіка для дзяцей і сцэнарый якіх ужо ў распрацоўцы.
У праграме таксама будзе задзейнічана рэзідэнцыя Дзеда Мароза і арт-аб’екты побач.
Галіна ГАШЧУК
Фота аўтара
