У апошнюю нядзелю кастрычніка ў Беларусі адзначаецца Дзень аўтамабіліста і дарожніка – прафесійнае свята ўсіх тых, хто ў няпростых умовах, у спякоту і мароз, у дождж і снег утрымлівае, рамантуе і будуе нашы дарогі.
Аб рабоце працаўнікоў дарожнай гаспадаркі раёна
расказаў у інтэрв’ю начальнік ДРБУ-141 Сяргей Савіч.
– Сяргей Паўлавіч, ужо з назвы арганізацыі відавочна, што галіна вашай дзейнасці звязана з дарогамі.
– Гэта так, асноўным відам дзейнасці і адной з галоўных задач нашай арганізацыі з’яўляецца ўтрыманне, бягучы і капітальны рамонт аўтамабільных дарог мясцовага значэння, якія знахо-дзяцца на балансе. Агульная працягласць крыху больш за тысячу км, з якіх дарогі мясцовага значэння – 451 км і вуліцы населеных пунктаў – 575 км. Большая частка мае асфальтабетоннае пакрыццё.
– Які аб’ём работ і якія значныя аб’екты выканала прадпрыемства сёлета?
– За 9 месяцаў гэтага года аб’ём выкананых работ склаў каля 6,1 млн рублёў. Найбольш значныя аб’екты гэтага года – бягучы рамонт дарог паміж населенымі пунктамі. Так, выкананы работы на ўчастку дарогі Глінка – Калонія працягласцю 2,6 км, Луткі – Кароцічы – 1,4 км, Варані – Бухлічы – Капані – 2,2 км, Вялікае Малешава – Рамель – Альшаны – 1,6 км. Усяго новае асфальтабетоннае пакрыццё атрымала каля 9 км дарог нашага раёна на агульную сумму 2,13 млн рублёў. Канешне, хочацца большага, але ўсё ўпіраецца ў фінансаванне.
– З якімі цяжкасцямі даводзіцца сутыкацца пры правядзенні дарожных работ?
– Складанасцю ў працы дарожнага будаўніка можна назваць кароткі будаўнічы сезон і пагодна-кліматычныя ўмовы. Тым не менш мы павінны строга выконваць патрабаванні і нормы, якія прад’яўляюцца да асфальтавання аўтамабільных дарог. Нягледзячы на ўсе складанасці, бягучы рамонт дарог выкананы амаль у поўным аб’ёме. Плануем, што ў наступным годзе мы нарэшце закрыем пытанне па дарозе да Лутак, а таксама будзем рамантаваць дарогу з Веляміч да Старыны. Там яшчэ дзейнічае пакрыццё з бруку. Яно, канешне, надзейнае, але надта нязручнае.
– Сяргей Паўлавіч, як абсталявана база ДРБУ? Стараннасць стараннасцю, але з голымі рукамі, з рыдлёўкамі добрай дарогі не зробіш.
– Сёння ў нас тэхнікі дастаткова. Як для будаўніцтва, так і для абслугоўвання дарог. У нас ёсць і спецыфічная тэхніка – устаноўка «Тайфун». Яе прызначэнне – рамонт дарогі метадам насычэння. Але ў халодны час устаноўка працаваць, вядома, не можа, таму што эмульсія пры пяці градусах цяпла хутка застывае. Прадукцыйнасць устаноўкі «Тайфун» высокая.
– Каб пабудаваць, адрамантаваць дарогу і ліквідаваць ямы, патрэбны матэрыял. Колькі асфальтабетону выкарыстоўвае ваша арганізацыя за год?
– Мы лічым за сезон. Так, выпуск асфальтабетону за 9 месяцаў бягучага года склаў амаль 35 тысяч тон, што на тры тысячы больш, чым летась. Лічу, што ў няпростых умовах мы забяспечылі значны прырост. Ды і сам завод не новы і пастаянна патрабуе да сябе ўвагі – то ў адным месцы падлапіць неабходна, то ў другім. Дзякуй, што на заводзе, ды і ўвогуле ў арганізацыі, працуюць сапраўдныя прафесіяналы сваёй справы, якія ў сціслыя тэрміны могуць паправіць становішча ў лепшы бок.
– Акрамя дарожных работ, што рабіла ДРБУ сёлета?
– Вялікая ўвага ў апошнія гады надаецца сельскай гаспадарцы – асфальтаванне тэрыторый мехдвароў, малочна-таварных комплексаў, сянажна-сіласных траншэй. У гэтым годзе мы ўжо заасфальтавалі дзесяць траншэй у розных гаспадарках раёна.
У завяршэнне Сяргей Савіч адзначыў, што гарантыя поспеху ў любой справе – калектыў. Яго згуртаванасць, адказнасць за даручаную справу, высокі ўзровень выканальніцкай дысцыпліны – гарантыя выканання пастаўленых задач.
Аляксандр НІКІФАРЭНКА
Фота аўтара
