Жывёлаводы Століншчыны пасля дасягнення рэкорднага паказчыка па вытворчасці малака па вынікам мінулага года – больш за 151 тысячу тон – не адпачываюць на лаўрах. Так, сёння нашы жывёлаводы атрымліваюць 20,53 кг малака ад адной каровы ў суткі, што больш на 2,51 кг, чым летась!
Зладжаная і адказная работа ўсяго аграпрамысловага комплексу раёна дазволіла заняць Століншчыне сёмае месца сярод 118 раёнаў рэспублікі па валавой вытворчасці малака і 18 месца – па сярэднім надоі ад адной каровы (6 812 кг).
Сёння па сярэднім надоі наш раён знаходзіцца на пятым месцы ў вобласці, палепшыўшы пазіцыю на адзін пункт. Прыемна адзначыць, што па валавой вытворчасці мы знаходзімся на трэцім радку – у суткі вырабляецца 459 тон малака. Наперадзе толькі Пружанскі раён (723 тонамі) і Пінскі (502 тоны). Але, у адрозненне ад нашага раёна, дзе налічваецца 22,75 тыс. дойных кароў, у Пружанскім – 36,45 тыс., Пінскім – 29 тыс.
Найбольшы ўклад у чарговае дасягненне нашых жывёлаводаў унеслі: ААТ «Новая Прыпяць» – 26,12 кг малака ў сярэднім ад адной каровы ў суткі, УП «Грушава-Мілк» — 25,77 кг, СВК «Фядорскі» – 23,53 кг. Больш за 20 кг малака таксама атрымліваюць у: ААТ «Палессе АВМ» (21,79 кг), ААТ «Кароцічы» (20,08 кг), ААТ «Лядзецкі» (22,68 кг), УП «Рубельскі» (21,66 кг).
***
Не першы год актыўны ўдзел у рэспубліканскай акцыі «Наш жывёлавод», якая праводзіцца Рэспубліканскім камітэтам Беларускага прафсаюза работнікаў АПК і Міністэрствам сельскай гаспадаркі і харчавання, прымае Століншчына. Прадстаўнікі раённага камітэта прафсаюза работнікаў АПК разам з кіраўніцтвам раёна выязджаюць на фермы і комплексы, каб падзякаваць жывёлаводам за працу, адзначыць лепшых работнікаў галіны.
– У рамках акцыі, якая пачалася ў снежні мінулага года, мы пабывалі ва ўсіх гаспадарках раёна, у тым ліку прыватных – «Грушава-Мілк» і «Максеммілк», – расказаў «НП» старшыня райкама прафсаюза работнікаў АПК Уладзімір Семянюк. – Былі заахвочаны 185 работнікаў, у тым ліку 114 жывёлаводаў, 61 аператар машыннага даення, сем галоўных заатэхнікаў і тры галоўныя ветэрынарныя ўрачы.
Праца ў жывёлаводаў ёсць круглы год. Спецыфіка прафесіі сельгасработніка такая, што яны працуюць і ў дрэннае надвор’е, і ў святы, уносяць значны ўклад у стварэнне харчовай бяспекі нашай краіны. Усе без выключэння – прафесіяналы сваёй справы.
Аляксандр
НІКІФАРЭНКА
Фота аўтара
