Нішто не бывае выпадковым у гэтым свеце, усё заканамерна. Гэтая аксіёма не патрабуе доказаў, пастаянна пацвярджаецца ў лёсе кожнага чалавека. Адным з прыкладаў з’яўляецца выбар працоўнага шляху Марыяй Зора.
Сям’я Зора, якая пражывала на радзіме гаспадара ў суседняй Украіне, у 1989 годзе пераехала ў Давыд-Гарадок да бабулі, мамы гаспадыні. Марыйцы якраз споўніўся адзін год. Час прабягаў непрыкметна. Гэтак жа хутка прайшлі гады вучобы ў СШ №2. У сям’і акрамя Марыі гадаваліся яшчэ двое дзяцей. Брат і сястра ўжо жывуць сваімі сем’ямі. Міхаіл працуе электрыкам ЖКГ у Давыд-Гарадку, а Таццяна – інспектарам па каранціне і абароне раслін у аг. Альшаны.
Марыя Уладзіміраўна – чалавек прамы, у яе няма імкнення выставіць сябе доктарам, які з пялёнак марыў аб прафесіі. Пытаюся: «Магчыма, Вы захацелі ратаваць людзей, калі брат трапіў у аварыю?». Яна ж шчыра прызнаецца, што у школьныя гады ў яе ніколі не з’яўлялася жадання прысвяціць сваё жыццё медыцыне. У старэйшых класах, калі паўстала праблема выбару, гаварыла: «Толькі не доктарам». Але ў адзінаццатым класе, паслухаўшыся параду мамы, пачала больш займацца біялогіяй і хіміяй.У Анжалікі Эдвардаўны дзядзька быў доктарам-неўролагам, стрыечныя браты і сястра таксама працавалі дактарамі. Чулае мацярынскае сэрца заўважыла і ў дачушкі якасці, патрэбныя для медыка. Ды і тата Уладзімір Рыгоравіч мае адносіны да медыцынскай работы: працуе вадзіцелем на станцыі хуткай дапамогі.
Спачатку пасля заканчэння Брэсцкага дзяржаўнага медыцынскага каледжа Марыя атрымала спецыяльнасць фельчара, па накіраванню трапіла ў Іванаўскі раён. Але вырашыла працягнуць навучанне ў ВНУ: здала тэсты і была залічана ў Гродзенскі дзяржаўны медыцынскі ўніверсітэт, які скончыла з чырвоным дыпломам. Падчас навучання ў тэрапеўтычнай групе абрала спецыялізацыю неўралогія.
Потым быў год інтэрнатуры ў Брэсцкай абласной неўралагічнай бальніцы, праца ў Бярозаўскай ЦРБ. У Бярозе фактычна адпрацавала два гады, тры гады знаходзілася ў водпуску па догляду за дзіцём: падрастала малая Ксюша. Пасля пераехала бліжэй да бацькоў. Спачатку працавала ў Столінскай цэнтральнай раённай бальніцы. Старанная, уважлівая, ветлівая Марыя Уладзіміраўна карыстаецца павагай пацыентаў. І не толькі: загадчыца неўралагічнага аддзялення ЦРБ вопытны доктар Наталля Міхайлаўна Лятун вельмі цёпла адклікаецца аб маладой калезе.
Цяпер Марыя Уладзіміраўна працуе ў паліклініцы Давыд-Гарадка. А ў часы водпускаў або курсаў доктара-неўролага з бальніцы Марыя Уладзіміраўна Зора зранку вядзе прыём у паліклініцы, а пасля спяшацца да пацыентаў у аддзяленне. І ўсюды яна спакойна і ўважліва адносіцца да хворых.
Давялося пачуць размову ў палаце. Адзін хворы даў такую адзнаку працы Марыі Уладзіміраўны: «Гэта доктар ад Бога». Пасля такіх слоў больш няма чаго прыбавіць.
Галіна
Бабарыка
