Што патрэбна пакупніку, калі ён прыходзіць у магазін? Так, каб былі неабходныя тавары і каб іх кошт задавальняў. Але самае галоўнае, каб прыемны быў прадавец, які і падкажа, і параіць. Такім з’яўляецца Вольга Бесанец – загадчык магазіна «Давыдаўскі», што ў Давыд-Гарадку.
І сапраўды, Вольгу Яўгенаўну рэдка пабачыш без усмешкі і ў дрэнным настроі. У яе талент працаваць з людзьмі, бо яна да кожнага можа знайсці падыход. Гэтаму яе навучыла мама Валянціна Васільеўна, якая больш за 40 гадоў аддала рабоце ў спажыўтаварыстве. Узначальвала магазін № 22 тады яшчэ Давыд-Гарадоцкага гарадскога спажывецкага таварыства. Менавіта разам з маці і пачынала працаваць Вольга ў 1997 годзе, калі скончыла школу. Была вучаніцай прадаўца, а паралельна вучылася ў Гомельскім кааператыўным інстытуце.
За той час, пакуль Вольга працавала ў магазіне № 22, яна набралася неабходнага вопыту ды і ў кіраўніцтва была на добрым рахунку. У 2010 годзе ёй прапанавалі стаць загадчыкам магазіна «Давыдаўскі». Знаходзіцца ён на аўтавакзале, таму людзі заходзяць абсалютна розныя. Хтосьці ў горадзе праездам, і важна, каб у чалавека засталося добрае ўражанне. А вось сваіх пастаянных пакупнікоў Вольга Яўгенаўна ведае добра і амаль заўсёды здагадваецца, па што яны прыйшлі.
– Кожны чалавек розны, таму і падыход да кожнага розны, – дзеліцца сакрэтам работы жанчына. – Адзін цалкам спадзяецца на прадаўца і яго веды, а другі можа гадзінамі выбіраць тавар і пайсці дадому з пустой сумкай. Хтосьці давярае на сто працэнтаў, другі можа пералічваць здачу па некалькі разоў. Хтосьці любіць пагаварыць, а хтосьці маўкліва разлічваецца. На мой погляд, у гэтым і вялікая карысць маёй работы, бо ты вучышся цярпенню і ведаеш, дзе трэба сказаць, а дзе – прамаўчаць. Але магу сказаць дакладна, што ў любым выпадку дапаможа ўсмешка.
Акрамя Вольгі, у магазіне працуюць Ірына Свірыдчук і самы вопытны прадавец Валянціна Калько. Жанчыны штомесяц выконваюць план па гандлі – 50 тысяч рублёў. Безумоўна, калі ў горадзе, як грыбы пасля дажджу, пачалі з’яўляцца прыватныя магазіны, узнікалі сумненні, ці ўтрымаюцца на плаву. Але ўтрымаліся і сваю планку не апускаюць.
– За столькі гадоў работы я зрабіла выснову, што самае галоўнае – быць чэсным з пакупніком, – дадае Вольга Яўгенаўна. – У нашым магазіне вы ніколі не знойдзеце пратэрмінаванай прадукцыі і, упэўнена, яе не павінна быць ні ў адным магазіне. Дастаткова толькі аднаму чалавеку набыць дрэнны тавар і ўсё – бывай добрая рэпутацыя. Але самае галоўнае нават не гэта, а здароўе чалавека, якім нельга рызыкаваць ні ў якім выпадку. Нашы пастаянныя пакупнікі пакідаюць нам заяўкі, што б яны хацелі бачыць на прылаўках. І мы заўсёды, калі ёсць магчымасць, ідзём насустрач. Некаторы час таму пачалі прадаваць ахалоджаную курыную прадукцыю. З’явілася і ўстаноўка для халоднага квасу, які так прыемна выпіць у летнюю спёку. Мы хочам, каб да нас ішлі з задавальненнем.
Таксама Вольга Яўгенаўна пастаянна працуе на выязным гандлі. Былі на Днях пісьменства ў Іванаве, Лунінцы, на раённых і абласных Дажынках, якія праходзілі ў родным Давыд-Гарадку. Па выхадных гандлююць у Тураве.
– Хоць і даводзіцца амаль цэлы дзень стаяць на нагах, але я вельмі люблю выязны гандаль. Па-першае, атрымліваеш асалоду ад святочнай атмасферы. А па-другое, гандаль на такіх вялікіх мерапрыемствах значна павялічвае даход магазіна. Як гаворыцца, прыемнае сумяшчаецца з карысным.
Ёсць у Вольгі яшчэ адно правіла: работу «пакідаць» на рабоце і наадварот. Чакаюць дома муж Алег і Насця, якая вучыцца ў сёмым класе. Сын Дзяніс сёлета пайшоў у армію. Вольга – клапатлівая маці і гаспадыня. Любімая страва – дранікі, якія ў яе атрымліваюцца вельмі смачныя. Некалькі гадоў разам з кумамі ездзілі адпачываць у Абхазію, прыгажосцю якой была зачаравана жанчына. Асабліва ўразілі горы і мора.
Але ж сваю краіну і свой родны горад Вольга ні на што не прамяняе. Таму кожны дзень з радасцю імчыць на веласіпедзе на работу і з усмешкай сустракае пакупнікоў.
Ганна
МЕЛЬНІК
Фота аўтара
