20 лютага на базе спартыўна-фізкультурнага комплексу “Аквамарын” прайшоў турнір па стральбе з пнеўматычнай вінтоўкі на першынство сярод членаў Столінскай раённай арганізацыі Беларускага грамадскага аб’яднання ветэранаў.
Яго мэта – павышэнне спартыўнага майстэрства стральбы з пнеўматычнай вінтоўкі, а таксама фарміраванне метадаў актыўнага адпачынку і здаровага ладу жыцця сярод ветэранаў.
За званне лепшага стралка спаборнічалі 12 удзельнікаў: сем мужчын і пяць жанчын.
Пераможцы вызначаліся па найбольшай колькасці заробленых ачкоў. Такім чынам вызначылі тры прызавыя месцы: першае заняла Людміла Глушакова (прадстаўніца ААТ “Белаграпрамбанк”), другое – Канстанцін Клімовіч (Столінскі аграрна-эканамічны каледж) і трэцяе – Сцяпан Комар (Столінскі аўтапарк). Уладальнікі трох прызавых месцаў узнагароджаны дыпломамі раённага савета ветэранаў і кашоўнымі падарункамі.
Турнір быў прысвечаны Дню абаронцаў Айчыны і Узброеных Сіл і адбыўся ў межах Месячніка абаронна-патрыятычнай і спартыўнай работы Столінскай раённай арганізацыйнай структуры ДТСААФ, якая арганізавала матэрыяльную частку спаборніцтваў.
Галіна ГАШЧУК
Фота аўтара
