У гэтым упэўнены галоўны ветэрынарны ўрач ААТ «ПалессеАВМ» Віталь Васюхневіч, які вакцынаваўся ў Альгомельскай амбулаторыі ўрача агульнай практыкі на гэтым тыдні. Віталь Сцяпанавіч мае дачыненне да медыцыны, таму ведае, пра што гаворыць. Сам ён хварэў кавідам у сакавіку гэтага года. На шчасце, абышлося без шпіталізацыі. Але нават праз час заўважае вынікі гэтай каварнай хваробы.
– Раней я не адчуваў свайго ўзросту, хоць у снежні 52 гады споўніцца. А пасля перанесенага каранавіруса пачаў адчуваць, што арганізм даў слабіну. Хацеў вакцынавацца яшчэ ў пачатку восені, але тады захварэў прастудай. Я ўсім сваім падначаленым раю вакцынавацца, таму што толькі так мы выпрацуем калектыўны імунітэт. Не ўсе прыслухоўваюцца, што дрэнна. Кавід вельмі непрадказальны і невядома, як ён паўплывае на арганізм. На жаль, хвароба забірае і маладыя жыцці. Асабліва патрэбна звярнуць увагу тым людзям, якія маюць лішнюю вагу, цукровы дыябет, высокі ціск. Яны моцна рызыкуюць, адмаўляючыся ад вакцынацыі.
Разам з ім вакцынаваўся і спецыяліст, адказны за ідэнтыфікацыю і рэгістрацыю жывёл, – Аляксей Шпакевіч. Юнак таксама да вакцынацыі ставіцца станоўча, хоць кавідам і не хварэў дагэтуль.
– Вакцына распрацоўвалася многімі вучонымі ў хуткім тэмпе для таго, каб дапамагчы людзям. І калі чалавек адмаўляецца ад яе, то значыць, ён адмаўляецца ад дапамогі. Як бачым, арганізм не кожнага чалавека можа самастойна падужаць хваробу. І ў Вялікім Малешаве многа сумных прыкладаў. Я вакцынаваўся, не раздумваючы, мне нават не важна, якой вытворчасці вакцына. Я давяраю медыцыне. Дрэнную антырэкламу робіць інтэрнэт, у якім начытацца можна ўсяго, чаго хочаш. Але статыстыка – рэч дакладная. Сярод тых, хто знаходзіцца на штучнай вентыляцыі лёгкіх, няма ні аднаго вакцынаванага. Таму людзям трэба рабіць высновы, – дзеліцца сваім меркаваннем Аляксей.
Усяго Альгомельская амбулаторыя абслугоўвае 4373 чалавекі, з якіх 2608 падыходзяць пад вакцынацыю. На сённяшні дзень прышчэпкі ад каранавіруса атрымалі каля 40 працэнтаў. Як расказала ўрач агульнай практыкі Іна Дзямко, зараз людзі пачалі больш актыўна вакцынавацца. Добрыя паказчыкі ў ААТ «Кароцічы». Таксама вакцынавана ўжо 70 працэнтаў калектыву Альгомельскай сярэдняй школы. Да такіх лічбаў падыходзіць і Вялікамалешаўская сярэдняя школа.
А вось работнікі ААТ «ПалессеАВМ» у роздуме. З 214 чалавек толькі 40 вакцынаваліся, у асноўным гэта адміністрацыя гаспадаркі.
На сёння ў амбулаторыю завезена вакцына кітайскай вытворчасці.
Застаецца спадзявацца, што людзі праявяць свядомасць і дапамогуць самі сабе, зрабіўшы прышчэпку ад каранавіруса.
Ганна
МЕЛЬНІК
