Пэўна, чытачы таксама моцна здзівяцца, калі даведаюцца, што ў гэтай маладой жанчыны пяцёра дзяцей. Менавіта таму Вольга Чынікайла з аграгарадка Альшаны з’яўляецца яшчэ адной уладальніцай ордэна Маці ў нашым раёне.
Асабіста мне Вольга нагадала Дзюймовачку з аднайменнай казкі. Самі падумайце, рост яе ўсяго 152 сантыметры, вага 52 кілаграмы і 35-ы памер нагі. Але вось за такімі жанчынамі, якія з гонарам нясуць званне Маці, будучыня нашай краіны.
А такі загаловак артыкулу дала таму, што ў сям’і Вольгі і яе мужа Ігара гадуюцца пяць дзяўчынак.
– Пэўна, ваш муж ужо звык да безлічы сукенак, заколак і лялек?
– Не тое слова. Нават лепей за мяне ведае звычкі кожнай дачушкі. На базары ці ў магазіне беспамылкова вызначыць, якога памеру адзенне трэба купіць. Дачок ён бязмерна любіць, але ж марыць пра сыночка. Хоча яго многаму навучыць. Таму, думаю, праз некаторы час будзем вырашаць гэтае пытанне, – смяецца жанчына.
Вольга – самая старэйшая дачка з пяцярых дзяцей. Дарэчы, у яе маці першыя чатыры таксама дзяўчынкі і толькі апошні хлопчык, які… з’яўляецца аднакласнікам сваёй пляменніцы Анжалікі. Так атрымалася, што маці і дачка нарадзілі дзяцей у адзін год.
– Для Альшан гэта нярэдкасць, паколькі тут рана выходзяць замуж, – тлумачыць Вольга. – Некаторыя людзі, асабліва не мясцовыя, вельмі здзіўляюцца і нават пытаюць: ці не давялося пашкадаваць аб сваім выбары? Не буду гаварыць за ўсіх, але асабіста я не пашкадавала. Тут як Бог дасць, можна і ў 30 гадоў пайсці, а шчасця не знайсці. А мне пашанцавала, бо з мужам мы ра-зам сталелі, развіваліся, будавалі сям’ю, нараджалі дзяцей. На мой погляд, сумесныя справы і побыт збліжаюць, а не разбіваюць каханне, як зараз модна гаварыць. Безумоўна, не ўсё бывае гладка, хапае праблем, але калі разам, то ўсё вырашальна. Галоўнае, каб былі здароўе і жаданне працаваць над адносінамі. Калі ж людзі не разумеюць адзін аднаго, не паважаюць, не чуюць, тады нічога не выратуе гэты шлюб. У гэтым годзе мы адзначылі 10 гадоў з дня вяселля, але нам удалося зберагчы пяшчотнасць. І я лічу гэта нашай агульнай заслугай.
У сваім доме сям’я Чынікайла жыве ўжо пяць гадоў. Вольга напоўніла яго ўтульнасцю і прыгажосцю. Тут заўсёды смачна пахне, бо гаспадыня любіць гатаваць. Трымаюць гаспадарку, зарабляюць грошы на зямлі.
Старэйшыя дочкі – 10-гадовая Галіна і 9-гадовая Анжаліка – маміны памочніцы і лепшыя сяброўкі. Дапамагаюць глядзець пяцігадовую Аксану, трохгадовую Таццяну і Алесю, якой толькі адзін год і восем месяцаў. Калі не ў рэйсе, са сваімі прынцэсамі ўвесь вольны час праводзіць бацька. А зараз усё сямейства рыхтуецца да Новага года – аднаго з любімых святаў.
Ганна
МЕЛЬНІК
Фота аўтара
