Я іду на рэферэндум

Анатоль Пашкевіч, трэнер па лёгкай атлетыцы Давыд-Гарадоцкай дзіцяча-юнацкай спартыўнай школы:
– Для мяне прыняць удзел у рэферэндуме – гэта выканаць свой грамадзянскі абавязак. Я ўважліва сачу за навінамі як нашай краіны, так і свету. На жаль, некаторыя з іх прымушаюць хвалявацца, асабліва тыя, што тычацца ваеннай канфрантацыі. Нельга дапусціць, каб у нашай роднай Беларусі стала чуваць стрэлы альбо выбухі мін.
І рэферэндум якраз накіраваны на тое, каб забяспечыць упэўненасць у заўтрашнім дні. Лічу, што любы канфлікт можна вырашыць мірным шляхам. Таму я адназначна буду галасаваць за ўсе змяненні і дапаўненні, унесеныя ў Канстытуцыю.
Паколькі я працую трэнерам больш за 20 гадоў, то асабліва мяне цікавяць пытанні развіцця спорту. Не сакрэт, што аўтарытэт краіны напрамую залежыць ад спартыўных дасягненняў. Спорт быў, ёсць і будзе спосабам гучна заявіць пра сябе на ўвесь свет.
Нядаўна скончылася алімпіяда. Мы з заміраннем сэрца глядзелі, як выконваюць скачкі фрыстайлісты і колькі закрылася мішэняў у нашых біятланістаў. Упэўнены, трэба як мага больш укладаць у спорт, каб потым бачыць вынікі. Таму мяне парадавала з’яўленне ў Канстытуцыі артыкула 32, у якім гаворыцца, што дзяржава спрыяе духоўнаму, маральнаму, інтэлектуальнаму і фізічнаму развіццю моладзі, стварае неабходныя ўмовы для свабоднага і эфектыўнага ўдзелу ў грамадскім жыцці, рэалізацыі патэнцыялу моладзі ў інтарэсах усяго грамадства. Я дакладна ведаю, што спартсмен становіцца вялікім, калі ў яго вераць: спачатку сям’я, потым трэнер і, самае галоўнае, дзяржава.
На адкрыцці рэспубліканскага першынства па лёгкай атлетыцы ў Брэсце, дзе я прысутнічаў, выступіў перад юнымі спартсменамі беларускі кідальнік молота, двухразовы чэмпіён свету, пераможца Алімпійскіх гульняў у 2008 і 2016 годзе, заслужаны майстар спорту Рэспублікі Беларусь Іван Ціхан. Ён адзначыў, што здольныя да спорту дзеці ёсць як у вялікіх гарадах, так і маленькіх вёсачках. Ён сам нарадзіўся ў вёсцы, таму ведае, пра што гаворыць. І дадаў, што нельга збіць з толку таго чалавека, які ўпэўнены ў сабе, які ведае, да чаго імкнецца і што хоча ад жыцця. Цалкам згодны з яго меркаваннем.
Гутарыла Ганна МЕЛЬНІК
Фота аўтара