Дыялогавая пляцоўка: Выхоўваць трэба не толькі моладзь, але і дарослых

Такое меркаванне выказалі ўдзельнікі сустрэчы, дзе абмяркоўваўся праект Праграмы патрыятычнага выхавання насельніцтва Рэспублікі Беларусь.
У дыялогу па асноўных палажэннях Праграмы прынялі ўдзел прадстаўнікі арганізацый і прадпрыемстваў раёна, а таксама намеснік старшыні Столінскага райвыканкама Сяргей Сідарэвіч, начальнік аддзела ідэалагічнай работы і па справах моладзі Святлана Піва і галоўны спецыяліст аддзела Галіна Шугалевіч.
У першых радках дакумента гучыць, што актуальнасць распрацоўкі Праграмы патрыятычнага выхавання насельніцтва абумоўлена геапалітычнымі выклікамі, неабходнасцю своечасовага ўмацавання дзяржаўнага суверэнітэту і нацыянальнай бяспекі Рэспублікі Беларусь праз кансалідацыю грамадства і народнага адзінства.
Занатавана ў Праграме і паняцце патрыятычных каштоўнасцяў. Да такіх адносяцца – малая радзіма, Радзіма, пераемнасць пакаленняў, нацыя, дзяржаўнасць і дзяржаўны суверэнітэт Рэспублікі Беларусь, дзяржаўная сімволіка (герб, гімн, сцяг), гістарычная памяць, нацыянальна-культурная ідэнтычнасць, сацыяльная і рэлігійная талерантнасць, нацыянальная культура і паліткультурнасць.
Агучаны таксама прыярытэтныя кірункі патрыятычнага выхавання. Сярод іх – духоўна-маральныя, гісторыка-краязнаўчыя, культурна-ваенна-спартыўна-патрыятычныя, прафесійны патрыятызм і валанцёрская дзейнасць.
Большасць з нас прызвычаіліся да меркавання, што выхаваннем, у тым ліку і патрыятычным, павінны займацца ўстановы адукацыі. Так, там шмат увагі надаецца гэтаму пытанню, але ўсё ж так, як прывіваюць асноўныя жыццёвыя пастулаты ў кожнай асобнай сям’і, ніхто не зможа перайначыць. Таму асаблівы ўхіл робіцца і на маленькую дзяржаву – сям’ю.
У ходзе сустрэчы абмяркоўвалі і такі момант, як выхаванне праз інтэрнет, уплыў сусветнай павуціны.
З практыкі вядомы шмат выпадкаў, калі няўменне ці, калі так можна сказаць, адсутнасць інфармацыйнай гігіены прыводзяць да скажэння фактаў. А як вынік – распаўсюджванне фэйкаў не толькі ў падлеткавым асяродку, але і сярод дарослых – гэта таксама актуальная праблема на сёння.
Гаварылі і пра ролю ідэолагаў на прадпрыемствах і ў арганізацыях.
Канешне, у Праграме ёсць шмат прапаноў наконт асноўных форм рэалізацыі кірункаў патрыятычнага выхавання. Але, напэўна, гэта не догма. Калі ёсць слушныя думкі, варыянты, іх можна і трэба агучваць.
Мы – беларусы і павінны ганарыцца сваёй краінай. Павінны ведаць яе гісторыю, культуру, сваіх продкаў.
Алена КЛІМУШКА
Фота аўтара