… у Вольгі Знавец з аграгарадка Вялікае Малешава, да якой я завітала ў адзін з цёплых асенніх дзянькоў.
Жоўтыя хрызантэмы растуць на клумбе і ў вялікіх вазонах. Здаецца, быццам сонейка аблюбавала дом Вольгі. Прыгажосць стварыла гаспадыня і вакол свайго дома. У садзе растуць яблыні, грушы, слівы і іншая садавіна, стаяць арэлі, у якіх можна адпачыць пасля працоўнага дня. Вельмі многа каннаў, якія ўзвышаюцца каля гаража.
Вольга прызнаецца, што адпачывае душой, калі працуе на сваім участку. Дом пабудавалі 10 гадоў таму, калі прыехалі з Амерыкі. У чужой краіне яны пражылі 14 гадоў, але захацелі вярнуцца на сваю малую радзіму. Сумавалі па вёсцы, дзе нарадзіліся. Нездарма ёсць прыказка такая: на радзіме сонца свеціць бясконца.
Разам з мужам Мікалаем трымаюць гаспадарку, вырошчваюць і прадаюць агародніну і садавіну. У старэйшага сына Уладзіміра ўжо нарадзілася дачушка Ліза – пакуль адзіная ўнучка Вольгі. Дачцэ Ангеліне 22 гады. Працуе бухгалтарам у бацькоўскай фірме. На год малодшы Дзяніс – на заробках у Амерыцы. А самай малодшай дачцэ Крысціне – 19 гадоў.
– Вельмі хутка выраслі дзеці, – кажа Вольга. – Здаецца, толькі што ў першы клас пайшлі. Час вельмі хутка ляціць. Таму моманты, калі ўсе збіраюцца дома, – самыя радасныя. Як любая маці, хачу, каб дзеці знайшлі сябе і сталі шчаслівымі. З любоўю і пяшчотай успамінаю сваю матулю, якой, на жаль, ужо даўно няма з намі побач. Маці нарадзіла і выхавала 12 дзяцей. І словам, і справай дапамагала ўсім. Мы вельмі дружная сям’я. Дарэчы, мае сёстры Таццяна і Любоў – мае ж суседкі. Выходжу я паліваць кветкі – і яны выхо-дзяць. Ды і адпачываем мы разам. У нас каронныя стравы – шашлыкі і плоў, якія гатуе мой муж. А я адказваю за салодкія стравы.
– Гэта вельмі важна, калі родныя побач. Сямейную сувязь губляць ні ў якім разе нельга, – упэўнена Вольга.
Ганна МЕЛЬНІК
Фота
аўтара
