Добраўпарадкаванне: Абыякавасць – не наш метад!

Традыцыйна вясною з удзелам кіраўніцтва раёна ў райцэнтры праходзіць своеасаблівая інспекцыя галоўных вуліц горада. Начальнікі, дырэктары, старшыні арганізацый і ўстаноў, прыватныя прадпрымальнікі абмяркоўваюць моманты не толькі па навядзенні парадку на замацаваных тэрыторыях, па высадцы кветак і ўсталяванні малых архітэктурных форм, але і гаворка ідзе пра выгляд фасадаў будынкаў, тратуараў, агароджы, неабходнасці выдалення небяспечных дрэў і гэтак далей.
Не стаў выключэннем і гэты год. За апошнія два тыдні крок за крокам абышлі вуліцы Церашковай, Дзяржынскага і Савецкую. І калі, на першы погляд, здавалася б, што асаблівых нараканняў няма, то пры больш кропкавым аглядзе было занатавана шмат момантаў, якія, мякка кажучы, трэба папраўляць.
У ходзе чарговага абходу да кіраўніцтва раёна звярнуліся жыхары вуліцы Усходняй. Іх просьбы цалкам лагічныя. Адсутнасць тратуараў, выбоіны і ямы, нязручнасці як для пешаходаў, сярод якіх, дарэчы, пераважная колькасць лю-дзей, што ідуць у паліклініку, нязручнасці і для вадзіцеляў, нязручнасці і для жыхароў.
Праблема з прывядзеннем у належны выгляд гэтай вуліцы, а таксама будаўніцтва большай па плошчы стаянкі для аўтатранспарту мясцовай
уладзе вядома. Больш таго, зроблена ўжо і праектная дакументацыя з неабходнай экспертызай. Аб’ект уключаны ў праграму сацыяльна-эканамічнага развіцця раёна на 2021 – 2025 гады. Аднак фінансаванне на гэты год не пацверджана.
Уладай прымаюцца ўсе магчымыя захады, каб усё ж такі сродкі на будаўніцтва вуліцы Усходняй былі выдаткаваны. А на цяперашні час дадзены ўказанні Столінскай жыллёва-камунальнай гаспадарцы выканаць работы па падтрыманні вуліцы ў такіх умовах, каб людзі маглі бяспечна прайсці і да ўстановы аховы здароўя, і да сваіх дамоў.
Фінальнай кропкай у абмеркаванні пытання добраўпарадкавання райцэнтра і тэрыторыі раёна наогул быў агульны сход прадстаўнікоў усіх сфер дзейнасці. Адно з цэнтральных пытанняў – правядзенне 16 красавіка рэспубліканскага суботніка. Адназначна было прынята рашэнне прыняць самы актыўны ўдзел у гэтым мерапрыемстве. Сродкі будуць накіраваны на фінансаванне капітальнага рамонту дзяржаўнага мемарыяльнага комплексу «Хатынь».
Як заўважыў старшыня Столінскага райвыканкама Рыгор Пратасавіцкі, ніхто да нас не прыедзе, каб наводзіць парадак і ствараць належныя ўмовы для жыцця. Толькі мы самі, разам павінны рабіць нашу малую Радзіму прыгажэйшай і больш утульнай!
Алена КЛІМУШКА
Фота аўтара