Зноў першымі ў раёне закончылі жніво ў КСУП «Варані». Такая хуткасць абумоўлена тым, што ў гаспадарцы ўбіралі ўсяго 500 гектараў. Менш толькі ў ААТ «Кароцічы». Але як па-іншаму, калі ў КСУП «Варані» не самыя лепшыя землі і проста можна страціць збожжа, калі ўбіраць несвоечасова.
– Першы камбайн на ўборку збожжавых выйшаў у поле 15 ліпеня, – расказвае дырэктар гаспадаркі Віктар СІМОНЧЫК. – Так, у нас невялічкія плошчы, таму мы першыя і заканчваем. Гэта ні ў якім разе не азначае, што мы хочам перад кімсьці паказацца лепшымі. Не. Так проста атрымліваецца. З чатырох камбайнаў адзін пакінулі ў вёсцы, каб абмалаціць збожжа мясцовым жыхарам. А такіх у нас каля 15 чалавек. Тры экіпажы былі накіраваны на дапамогу іншым гаспадаркам – адзін у КУВП «Манькавічы» і два ў УП «Рубельскі».
– Хачу адзначыць, што ў гэтым годзе ў нас крыху лепей з ураджайнасцю – 29,9 ц/га супраць леташніх 28,4 ц/га. Усяго ўдалося сабраць амаль 1500 тон збожжавых. Нягледзячы на якасць нашай зямлі на некаторых участках атрымлівалі больш за 40 ц/га аўса, ячменю і іншых культур. Амаль 30 ц/га – лічу, не мяжа для нас. Пры пэўных умовах можна дадаваць некалькі цэнтнераў.
Аляксандр НІКІФАРЭНКА
Фота аўтара
