У суботу, 13 ліпеня, у храме Пакрова Прасвятой Багародзіцы ў аг. Плотніца з удзелам епіскапа Пінскага і Лунінецкага Георгія прайшла Архіерэйская служба з нагоды заканчэння будаўніча-рамонтных работ цэнтральнай часткі царквы.
Сустракалі вялікага госця хлебам-соллю наведвальнікі мясцовай нядзельнай школы, а таксама шматлікія прыхаджане, якія спецыяльна прыехалі не толькі з Плотніцы, але і іншых населеных пунктаў.
У завяршэнні Богаслужэння епіскап Пінскі і Лунінецкі Георгій узнагародзіў Архіерэйскімі граматамі за служэнне праваслаўнай царкве шэраг мясцовых прыхаджан, якія на працягу многіх гадоў служаць у храме. Таксама епіскап павіншаваў і настаяцеля царквы Пакрова Прасвятой Багародзіцы іерэя Паўла Мануйлу. Акрамя Архіерэйскай граматы іерэй Павел быў адзначаны Падзякай ад старшыні райвыканкама за захоўванне гісторыка-культурнай спадчыны і духоўную асвету насельніцтва раёна.
Даведка: царква, якая знаходзіцца ў цэнтры аграгарадка, была пабудавана ў 1875 г. на сродкі прыхаджан з дапамогай ад казны. Будынак з дрэва ў выглядзе даўгаватага крыжа з адным адкрытым і чатырма глухімі купаламі. У царкоўным архіве метрычныя кнігі захоўваюцца з 1819 па 1829 гг. і з 1842 г. па цяперашні час.
Аляксандр НІКІФАРЭНКА
Фота аўтара
