Сёння ўпершыню Беларусь святкуе Дзень народнага адзінства.
Разнапланавыя мерапрыемствы з гэтай нагоды праходзяць ужо на працягу тыдня па ўсёй краіне. Гэта велааўтапрабегі, лёгкаатлетычныя кросы, школьныя лінейкі, інтэлектуальня спаборніцтвы, дыялогавыя пляцоўкі і шмат іншага.
15 верасня ў горадзе Століне прай-шло ўрачыстае мерапрыемства, прысвечанае Дню народнага адзінства. Землякоў і гасцей вітаў член Савета Рэспублікі Нацыянальнага сходу Рэспублікі Беларусь, старшыня Столінскага райвыканкама Рыгор Пратасавіцкі:
– Сапраўдны сэнс свята глыбока сімвалічны. Ён не столькі вяртае нас у мінулае, колькі прапануе звярнуць нашы погляды ў будучыню.
Яднанне дзеля захавання нашай багатай гісторыі, унікальнай культуры, яднанне дзеля фарміравання магутнай і ганаровай дзяржавы, у якой будуць жыць нашы дзеці.
Адноўленае ў 1939 годзе адзінства беларускага народа дазволіла выстаяць у гады Вялікай Айчыннай вайны, заняць ганаровае месца на міжнародным узроўні, стаць аднымі з заснавальнікаў Арганізацыі Аб’яднаных Нацый.
Народная перамога вылучыла адзінства нацыі ў разрад самых высокіх духоўных каштоўнасцяў. Любоў да Радзімы, да людзей, да справы аб’ядноўваюць нас з нашымі продкамі. І таксама як яны, мы працягваем умацоўваць адзінства нашага грамадства, разумеючы, што гэта залог паспяховага развіцця краіны на гады, на дзесяцігоддзі наперад.
Кіраўнік раёна агучыў і асноўныя моманты ў развіцці сучаснай Століншчыны. Дзякуючы дзяржаўнай палітыцы і сумесным намаганням усіх жыхароў, у рэгіёне добра развіваецца аграрны сектар. Ёсць значныя вынікі па тэмпах росту валавой прадукцыі сельскай гаспадаркі. За апошнюю пяцігодку тэмп росту вытворчасці малака склаў каля 140 працэнтаў, а па выніках мінулага года атрымана 130 тысяч тон гэтага прадукту. Гэта дзясятае месца сярод 118 раёнаў краіны.
Фермерскія гаспадаркі Століншчны штогод вырабляюць больш за 30 працэнтаў сельгаспрадукцыі. Садавіна і агародніна пастаўляецца не толькі ў гандлёвыя кропкі Беларусі, а і краіны бліжняга і далёкага замежжа. Вядомы і нашы прамысловыя прадпрыемствы – ААТ «Савушкін прадукт», КУВП «Манькавічы», Столінскі і Давыд-Гарадоцкі хлебазаводы, ПП «Полесские пряности», ФГ «Альшаны» і іншыя.
Актыўна будуюцца ў раёне шматкватэрныя і індывідуальныя жылыя дамы, што ў сваю чаргу выклікана вялікай колькасцю мнагадзетных сем’яў. Кожная трынаццатая жанчына, узнагаро-джаная ордэнам Маці ў Беларусі, мае Столінскую прапіску.
Працягваюцца работы па вода- і газазабеспячэнні, добраўпарадкаванні і будаўніцтве дарог. Дынамічна развіваецца прыватны бізнес. Пастаянна ўмацоўваецца матэрыяльна-тэхнічная база ўстаноў сацсферы.
У нас пануе ўзаемная павага прадстаўнікоў усіх веравызнанняў.
Рэспубліка Беларусь – незалежная, суверэнная краіна. А гэта ў сучасным свеце могуць дазволіць сабе адзіныя дзяржавы. Беларусь у іх ліку і гэта наш гонар! Мы моцныя, калі мы адзіныя!
Старшыня райвыканкама Рыгор Пратасавіцкі выказаў словы падзякі і шчырага прызнання ўсім, хто сваёй працай уносіць значны ўклад у развіццё раёна, хто актыўна займаецца грамадскай дзейнасцю, праяўляе сваю грамадзянскую пазіцыю. Лепшыя з іх былі ўзнагароджаны Ганаровымі граматамі райвыканкама, а таксама граматамі раённага Савета дэпутатаў.
На славу пастараліся і нашы прафесіяналы сцэны. Цудоўныя канцэртныя нумары правялі па старонках развіцця Беларусі ад старажытнасці да сучасных гадоў.
Алена КЛІМУШКА
Фота Наталіі ЦЭЦЭРСКАЙ
