Ад песні бабулі да справы душы

Калі сэрца цягнецца да песні, тады музыка становіцца прафесіяй.
Аліна Гарцуева нарадзілася ў Верхнім Церабяжове. І з самага маленства акунулася ў творчую атмасферу. Яе матуля Таццяна Іванаўна, бабулі – Святлана Андрэеўна, Валянціна Андрэеўна і Ніна Баляславаўна – спявалі ў аматарскім калектыве мясцовага Дома культуры. І з дзяцінства Аліна была пастаянна на рэпетыцыях і канцэртах. Стала лагічным, што, будучы яшчэ выхаванкай дзіцячага садка, яна стала спяваць на сцэне.
Дзяўчынку прыкмецілі работнікі Дома культуры: раскрывалі яе талент, любоў да песні, прапаноўвалі ўдзел у конкурсах, фестывалях.
Ужо цяжка і згадаць колькасць тых конкурсаў, у якіх за сваё жыццё прыняла ўдзел дзяўчына. Зараз яна навучэнка апошняга курса Баранавіцкага музычнага каледжа. Спявае часцей у Баранавічах, чым на Століншчыне. Там яна ў складзе ансамбля народнай песні “Дзівосы”, народнага вакальна-харэаграфічнага ансамбля “Палазанька” Баранавіцкага гарадскога дома культуры.
Будучы навучэнкай каледжа, Аліна таксама прымае актыўны ўдзел у мерапрыемствах рознага ўзроўню. Адзін з апошніх – Міжнародны тэлевізійны конкурс “Кубак сяброўства”. Напачатку дзяўчына прайшла адбор у Беларусі, а пасля заняла першае месца, атрымаўшы і сам кубак.
Міжнародны фестываль-конкурс славянскай песні “Оптинская весна” (лаўрэат ІІ і ІІІ ступені ў 2018 і 2017 гадах), дыпламантка абласнога песеннага форуму “З любоўю да песні”, рэспубліканскага конкурсу дзіцячай творчасці, Рэспубліканскага дзіцячага фестывалю-конкурсу выканаўцаў народнай песні “Жывая крыніца”, Рэспубліканскага конкурсу музычнага мастацтва Беларусі “Спадчына”, адкрытага конкурсу патрыятычнай песні “Моладзь і час: подзвіг у імя будучыні” і многіх іншых.
Зараз рыхтуецца да конкурсу музычнага мастацтва Беларусі ў Заслаўі, юбілею калектыву “Валачобнікі” інстытута культуры і мастацтва.
Аліна выконвае песні як на рускай, так і на беларускай мове. Але роднае слова ёй бліжэй і спяваць беларускія песні падабаецца больш. Выконвае яна і эстрадныя песні.
У бліжэйшых мэтах дзяўчыны – паступленне ў інстытут культуры на аддзяленне “Народны хор”, а яшчэ яна хоча стаць удзельніцай хору імя Цітовіча пад кіраўніцтвам Міхаіла Дрынеўскага.
Таццяна СЕГЕН