Алену Вандзіч можна смела назваць верным і неразлучным сябрам раённай газеты. З 1987 года яна працуе паштальёнам у аддзяленні паштовай сувязі аг. Белавуша.
Нарадзілася ў Жабінкаўскім раёне. Пасля школы вучылася ў Кобрынскім прафесійна-тэхнічным вучылішчы. Два гады працавала ткачыхай. На Століншчыну пераехала, бо выйшла замуж за мясцовага юнака.
Калі прыйшла працаваць паштальёнам, хутка асвоілася. Бо з паштовай справай была добра знаёма з дзяцінства: яе маці была загадчыкам паштовага аддзялення, цётка таксама працавала на пошце. Дзяўчынка з ахвотай брала стос газет і ішла па вуліцы, напаўняючы паштовыя скрынкі навінамі, замалёўкамі, аповедамі пра людзей.
– У нас у сям’і ўсе любілі чытаць, – кажа паштальён. – Я і зараз, як у пачатку сваёй работы, перш-наперш люблю перагарнуць старонкі свежай газеты. Што цікавае прачытаю сёння ў “НП”? Звяртаю ўвагу на анонс. Гэтыя матэрыялы чытаю ў першую чаргу. А яшчэ люблю інфармацыю пра нараджэнні і вяселлі, асноўныя падзеі раёна, рубрыку “Нашы дзеці”.
Жыхары аграгарадка кажуць, што паштальён стала ім як родная, хоць і не мясцовая. Прывыклі да яе.
Алена Аляксандраўна згадвае, якой была “НП”, калі яна прыйшла працаваць – усяго два лісты чорна-белага колеру, выходзіла тры разы на тыдзень – у аўторак, чацвер і суботу. З цягам часу выданне змянялася: станавілася больш пухлым і каляровым. Не толькі знешнія змены адбываліся, а і “начынка” станавілася іншай: больш грунтоўнай, якаснай. У параўнанні з газетай, якая выходзіла ў 90-ыя гады, можна смела сказаць, што яна вырасла, стала важкай па многіх крытэрыях.
Пытаюся ў паштальёна пра самых актыўных чытачоў. Жанчына крыху задумваецца і пачынае пералічваць: гэта Леанід Храпіцкі (вул. Набярэжная, 27), Марыя Храпіцкая (вул. Набярэжная, 33), Лілія Пачко (вул. Гастэлы, 23). Ды не толькі яны. Многія жыхары аграгарадка шмат гадоў выпісваюць раённую газету.
– Я заўсёды іду да людзей з добрым настроем, – прызнаецца Алена Вандзіч. – У гэтым, напэўна, і заключаецца сакрэт добрага выніку. Люблю размаўляць і з людзьмі пажылога ўзросту, і з маладымі. Усім прапаную падпісацца на любімыя выданні.
Паштальён дастаўляе газеты па 14 вуліцах населенага пункта. Пастаянны рух і свежае паветра даюць сілы і бадзёрасць. Каля 160 экзэмпляраў раённай газеты разносіць аднавяскоўцам, якія чакаюць і любяць свежую прэсу.
Жанчына прывыкла ставіцца да жыцця і любых абставін з пазітывам. Так, лічыць Алена Аляксандраўна, хутчэй і справа робіцца, і намечаныя планы ажыццяўляюцца. А “НП” вельмі прыемна, што сярод людзей, якія дастаўляюць раёнку да падпісчыкаў, ёсць такія верныя і адданыя сваёй справе супрацоўнікі.
Развітваючыся з Аленай Вандзіч, дамовіліся і далей працягваць сяброўства…
Святлана МАРОЗ
Фота аўтара
