Аляксей Гушча – малады спецыяліст ААТ «Палеская ніва». Ён з’яўляецца кіраўніком вытворчага ўчастка ў Велямічах. Сюды прыехаў працаваць, маючы мэтавае накіраванне.
Аляксей пасля заканчэння Веляміцкай сярэдняй школы паступіў у Беларускую дзяржаўную сельскагаспадарчую акадэмію. Выбраў спецыяльнасць агранома.
– Мне з дзяцінства падабалася гэтая прафесія, паколькі ў нас заўсёды была і ёсць зараз вялікая гаспадарка. Я адразу хацеў працаваць на радзіме, таму і папрасіў мэтавае накіраванне, – кажа юнак.
Прыехаў ён сюды ў пачатку 2019 года, а ўжо ў маі атрымаў павестку для праходжання службы. Яе ён нёс у Брэсце ў войсках міністэрства ўнутраных спраў. Запамінальным стала ахова правапарадку ў час правядзення Еўрапейскіх гульняў у Мінску. Але горад не прывабіў юнака, і ён вярнуўся ў Велямічы.
– Мне ніколі не было камфортна ў вялікім горадзе. Чамусьці цягнула ў родную вёску. Безумоўна, кожнаму сваё, а я дакладна не гарадскі жыхар, – дадае Аляксей.
Зараз у яго абавязкі ўваходзіць кантроль за правядзеннем усіх работ на вытворчым участку. Безумоўна, многае падказваюць старэйшыя калегі. Аляксей вельмі хутка знайшоў агульную мову з усімі механізатарамі і вадзіцелямі. Дарэчы, з ім я пазнаёмілася, калі рыхтавала рэпартаж пра нарыхтоўку кармоў. Юнак здзівіў сваёй сціпласцю і адкрытасцю.
– Яшчэ бацькі мяне вучылі, што як ты да лю-дзей, так і людзі да цябе. Заўсёды карыстаюся гэтым правілам, – гаворыць малады спецыяліст.
У вольны час дапамагае даглядаць палі бацькам. Цяпер яны ў яго часта просяць парады як у дасведчанага спецыяліста. Ужо мае свой аўтамабіль, а раней захапляўся матацыкламі. А яшчэ любіць спорт, якім пачаў займацца яшчэ студэнтам. Разам з сябрам Дзмітрыем Саноцкім, які працуе ў Відзіборы, пасля заняткаў часта хадзіў у трэнажорную залу.
У будучыні марыць купіць кватэру ў Давыд-Гарадку і стварыць сям’ю. Хаця на пытанне, ці мае ён каханую, адказаць адмовіўся.
Добра, што ў сельскай гаспадарцы ёсць маладыя спецыялісты, якім па-сапраўднаму цікава працаваць. Бо зямля – гэта наша багацце.
Ганна
МЕЛЬНІК
Фота аўтара
