15 сакавіка – Дзень Канстытуцыі Рэспублікі Беларусь: Будучыня прававой дзяржавы

У нядзелю ў нашай краіне адзначаецца важнае дзяржаўнае свята – Дзень Канстытуцыі Рэспублікі Беларусь.
Наш асноўны прававы дакумент быў прыняты ў 1994 годзе і стаў фундаментам маладой краіны.
На аснове Канстытуцыі фарміруецца ўся сістэма сённяшняга заканадаўства Беларусі, у ёй вызначаны кампетэнцыі дзяржаўных органаў. Ведаць свае правы і абавязкі, падпарадкоўвацца законам краіны, у якой ты жывеш, – гэта задача кожнага сумленнага чалавека.
У школах Беларусі Канстытуцыю вывучаюць на ўроках правазнаўства. Асаблівая ўвага вывучэнню асноўнага дакумента нашай краіны надаецца ў прававых класах, якія дзейнічаюць на базе СШ № 2
г. Століна. Большасць выпускнікоў гэтых класаў звязваюць сваю будучыню з прававымі спецыяльнасцямі.
Напярэдадні свята ў навучэнцаў 10 «А» класа прайшлі заняткі, прысвечаныя гэтай дзяржаўнай даце. Рабяты вывучалі асноўныя параграфы Канстытуцыі, спыніліся на важных для іх накірунках.
Вучні прававых класаў у сваёй большасці ўжо вызначыліся з будучай прафесіяй і добра ведаюць ролю законаў у палітычным, эканамічным, сацыяльным жыцці любой краіны. Таму яны надаюць пільную ўвагу вывучэнню не толькі асноўнага закону краіны, а і іншых прававых і заканадаўчых актаў. Менавіта за такімі актыўнымі і мэтанакіраванымі маладымі людзьмі будучыня нашай прававой дзяржавы.
Таццяна СЕГЕН
Фота аўтара