Дом культуры ў вёсцы – месца адпачынку, цікавага правядзення часу і разнастайных вясёлых праграм.
У 2018 годзе ў Асавой прай-шло свята працаўнікоў вёскі «Дажынкі». У лепшы бок змяніліся ўмовы працы. Будынак адрамантавалі, правялі ацяпленне, дабавіліся новыя памяшканні. Абнавіўся знешні выгляд – цяпер гасцей і аднавяскоўцаў сустракае яркі фасад.
Капітальны рамонт Дома культуры, можна сказаць, удыхнуў новае жыццё ў дзейнасць работнікаў культуры, даў новы творчы віток. Пра гэта кажуць і работнікі ўстановы, і шматлікія гледачы канцэртных праграм.
У будынку ДК размешчана таксама аддзяленне паштовай сувязі, фельчарска-акушэрскі пункт, бібліятэка. А яшчэ – этнаграфічны куток, які выклікае асаблівую цікавасць у дзяцей. Ён дзейнічае з 2012 года. У ім сабраны старадаўнія рэчы, сярод якіх самавар, млын, ступа, прыбраны ложак, вышытыя карціны мясцовых жыхарак. Экспанаты збіралі ў Асавой, Відзіборы, Камарніках, Церабішчы і іншых вёсках. Некаторыя людзі самі перадавалі старыя рэчы ў «міні-музей».
У этнаграфічным кутку пабывалі не толькі навучэнцы мясцовай і бліжэйшых школ, а і замежныя госці: італьянцы, немцы, галандцы, расіяне. Свае ўражанні яны пакідаюць у кнізе водгукаў і прапаноў.
У Доме культуры размешчаны карціны Анатоля Зялёнкіна з в. Камарнікі, які адлюстраваў на іх прыгажосць роднага краю. Можна азнаёміцца з чатырма работамі, пятую рыхтуюць да паказу.
У мінулым годзе Асаўскі дом культуры быў занесены на раённую Дошку гонару. Адна з асноўных задач, якія стаяць перад творчымі работнікамі, – арганізацыя вольнага часу, правядзенне культурна-масавых мерапрыемстваў. Асаўскі дом культуры абслугоўвае шэсць бліжэйшых вёсак. Гэта Відзіборац, Церабішча, Камарнікі, Асаўцы, Варсынь і Асавая. Тут пражываюць 497 чалавек, у Асавой – 140. У мінулым годзе правялі больш за 200 мерапрыемстваў для дзяцей і дарослых.
Мікалай Кавалёў – загадчык сельскага Дома культуры, Жанна Квятка – культарганізатар. Яны – асобы, улюбёныя ў мастацтва і сваю справу.
Мікалай Мікалаевіч з 2003 года займае пасаду дырэктара, да гэтага быў мастацкім кіраўніком. Працаваў у Вялікім Лесе, Відзіборы. Мужчына піша вершы, байкі. Супрацоўнічае з народным клубам аматараў песні «Ярок». Дарэчы, на свяце працаўнікоў вёскі «Дажынкі» ў Давыд-Гарадку выконваліся яго прыпеўкі пра аграгарадкі і вёскі Століншчыны.
Жанна Юр’еўна ў Асаўскім доме культуры з 2011 года. Раней працавала ў бібліятэцы ў Століне. Лёс склаўся так, што пераехалі ў Асавую. Але, як кажа жанчына, тут ёй падабаецца: і вёска, і прырода, і творчая дзейнасць. Райцэнтр – недалёка, пры неабходнасці можна хутка дабрацца.
Пры Доме культуры дзейнічаюць гурткі вакальных і сольных спеваў, аматарскія аб’яднанні: «Крепышок» па вядзенні здаровага ладу жыцця, «Эрудит» – інтэлектуальныя гульні, «Юморина» – аб’яднанне аматараў добрага гумару.
Адзін з любімых клубаў хлопчыкаў і дзяўчынак – «Лира». Тут дзеці ладзяць разнастайныя пастаноўкі, сярод якіх – «Калабок», «Чырвоны Капялюш», «Гусі-лебедзі», «Папялушка». Гурткі і аб’яднанні наведваюць людзі, якія любяць і цэняць творчасць, вучацца новаму і карысна праводзяць час.
Самыя актыўныя ўдзельнікі ўсіх мерапрыемстваў – сястрычкі Аляксандра, Дар’я і Валерыя Пашкевіч, Аляксей Яворскі, Дзмітрый, Лілія і Уладзіслаў Квятка, Юрый Трушко, Ілья Мураўёў, Мікалай і Паліна Ляшкевіч, Арцём Белавус.
– Работа з дзецьмі і падлеткамі – адзін з прыярытэтных кірункаў дзейнасці нашай установы, – кажа Жанна Квятка. – Развіццё здольнасцяў, фарміраванне творчай асобы… Гэтыя задачы мы ставім перад сабой пры падрыхтоўцы і правядзенні мерапрыемстваў: гульнявых, конкурсных, па-знавальных, тэатральных, забаўляльных праграм.
Актыўную дзейнасць вядзе клуб аматараў песні «Медуніца». Яго ўдзельнікі – Лідзія Дзямчук, Марыя Закрэўская, Вольга Пашкевіч, Жанна Квятка і Сняжана Кісель.
Калектыў выступае на святах раённага ўзроўню: мерапрыемствах, прысвечаных Дню Незалежнасці, Масленіцы, адкрыцці рэзідэнцыі Дзеда Мароза. Яркія ўражанні пакінуў удзел у Міжнародным пленэры ганчароў, у абласных Дажынках у Давыд-Гарадку.
«Медуніца» рыхтуе праграмы і для аднавяскоўцаў. Падтрымліваюць сельскіх працаўнікоў у час уборачнай кампаніі. Бывае, калі выступаюць перад знаёмымі, больш хвалююцца, чым на вялікай сцэне.
Не так даўно артысты «пераапрануліся» ў новыя касцюмы. Раней адзінага стылю ў калектыву не было. Цяпер усё інакш. У час выступленняў выканаўцы выходзяць на сцэну ў доўгіх белых сукенках, вышытых узорамі пяшчотнага ружовага колеру. Гэта прыйшлося даспадобы і гледачам, і самім артыстам.
Рэпертуар клуба – народныя, аўтарскія песні. Любяць кампазіцыі ансамбля «Бяседа».
У Асавой праводзіцца Дзень вёскі. Для невялікіх населеных пунктаў – гэта традыцыйнае свята, якое збліжае вяскоўцаў. Паколькі ў зону абслугоўвання Дома культуры ўваходзяць некалькі вёсак, культработнікі вырашылі арганізоўваць Дні вёскі і ў іх. Правялі свята ў Асаўцах, потым сумясцілі Камарнікі і Церабішча.
А «падкінулі» такую ідэю выхадцы з в. Церабішча, якія жывуць у розных гарадах нашай краіны. Яны сочаць за старонкай Дома культуры ў сацыяльнай сетцы «Аднакласнікі», знаёмяцца з навінамі, пакідаюць каментарыі. Тут жа прапанавалі правесці свята, паколькі планавалі сустрэчу на радзіме. Мерапрыемства ўдалося на славу, вельмі спадабалася гасцям.
У Асаўскім ДК праводзіцца работа з моладдзю, сем’ямі, пажылымі. Акрамя канцэртаў і танцавальна-забаўляльных праграм, гэта вечары і сустрэчы, дзе можна ў цёплай абстаноўцы пагутарыць.
Святлана МАРОЗ
Фота аўтара
