Складаючыя поспеху

З лютага па кастрычнік 2023 года праводзілася рэканструкцыя МТФ в. Турское намаганнямі работнікаў ААТ «Палеская ніва».
Столiнская ПМК-24 была задзейнічана для ўстаноўкі клюшак.
– Поспех у любой справе не прыходзіць проста так, у яго ёсць свае складаючыя, – кажа дырэктар ААТ «Палеская ніва» Аляксей Бародзіч. – Наша гаспадарка вельмі вялікая, таму, каб дабіцца добрых паказчыкаў у вытворчасці малака і мяса, трэба ісці ў нагу з часам. Без поўнай рэканструкцыі будынкаў малочнатаварных фермаў не будзе станоўчага выніку. Узяць, напрыклад, жывёлін: пасля рэканструкцыі будынка каровы знаходзяцца на прывязным утрыманні з круглагадовым збалансаваным кармленнем. Каровы падзелены па групах і атрымліваюць усе неабходныя кармы – сянаж, сілас, канцэнтраты і інш. Сваімі сіламі выканалі рэканструкцыю двух кароўнікаў на 500 галоў дойнага статка. На дадзены момант загрузка няпоўная: на ферме знаходзяцца 358 жывёлін. Поўнасцю ўкамплектаваць яе плануецца да канца года. Пабудаваны даільны блок з устаноўкай даільнага абсталявання «Елачка». Праграма сістэмы кіравання даільнай залай дазваляе весці ўлік надояў па кожнай карове. Устаноўлена сістэма водапаення і сучаснае халадзільнае абсталяванне. Нягледзячы на тое, што МТФ в. Турское набірае добрую дынаміку, рэканструкцыя канчаткова не завяршылася. Ідзе поўным ходам добраўпарадкаванне тэрыторыі і агароджа фермы, падводзіцца відэаназіранне. Побач з МТФ уведзены дзве сянажна-сіласныя траншэі на пяць тысяч тон.
Дырэктар ААТ «Палеская ніва» паставіў перад сваімі работнікамі дастаткова складаную, але цалкам выканальную, як аказалася, задачу – завяршыць работы да прафесійнага свята аграрыяў. Вядома, было няпроста, але работнікі гаспадаркі працавалі на аб’екце з вялікім энтузіязмам і справіліся з пастаўленай задачай. Цяпер тут створаны камфортныя ўмовы і для працы работнікаў: ёсць пакой адпачынку, санітарны пакой з пральнай машынай, а галоўнае, людзі зараз знаходзяцца ў цяпле. На МТФ в. Турское працуюць дваццаць шэсць чалавек пад чулым кіраўніцтвам загадчыка Канстанціна Аблавушкі.
– Самы складаны перыяд перажылі, – гаворыць галоўны заатэхнік Аксана Вабішчэвіч. – Статак прывыкае да новых умоў. Цяпер усе намаганні накіраваны на рэабілітацыю кароў і вытворчасць.
На МТФ «Пескі» в. Цераблічы праведзена перабудова старой «радзілкі» пад цялятнік, які разлічаны на 200 галоў жывёлін.
Чарговую рэканструкцыю цялятніка для дарошчвання маладняку да шасці месяцаў скончылі ў ААТ «Палессе АВМ». Ён разлічаны на 400 месцаў. Адзначу, што ў самім цялятніку добраўпарадкавана камфортнае бытавое памяшканне для персаналу: ёсць санвузел, ацяпленне і месца для адпачынку.
– Неабходнасць рэканструкцыі цялятніка была прадыктавана часам, – кажа галоўны ветурач Віталь Васюхневіч. – На сёння тут зроблена ўсё для таго, каб арганізаваць работу жывёлаводаў з захаваннем сучасных тэхналагічных патрабаванняў і рэкамендацый, нарошчваць пагалоўе, змяншаючы пры гэтым працоўныя і грашовыя затраты.
Для зручнасці штомесячнага ўзважвання цялят для дарошчвання ў ААТ «Палессе АВМ» закуплены новыя перасовачныя вагі.
Дарэчы, уся работа па рэканструкцыі ў дзвюх гаспадарках была праведзена за кошт уласных сродкаў.
За апошнія некалькі гадоў у раёне было ўведзена ў строй нямала будынкаў пасля рэканструкцыі, якія прадугле-джваюць не толькі стварэнне камфортных умоў для работы людзей і ўтрымання жывёлін, але і пашырэнне, умацаванне вытворчай базы для далейшага нарошчвання тэмпаў вытворчасці, што з’яўляецца ўкладам у справу падтрымання харчовай бяспекі краіны. Наш раён – гэта месца, дзе з пакалення ў пакаленне прымнажаюцца добрыя традыцыі, жыве імкненне пераадолець цяжкасці і дзе кожны сваёй добрасумленнай працай уносіць свой уклад у развіццё сваёй малой радзімы.
Вольга СЕГЕН
Фота аўтара