Красавік – гарачая пара для гаспадарак раёна. Не выключэнне і ААТ «Кароцічы», дзе кіпяць работы. Паглядзець, дзе і што робіцца, адправіліся разам з галоўным аграномам гаспадаркі Аляксандрам Любічам.
Ва ўрочышчы Гуцаў поўным ходам ішла падкормка рапсу і ўнясенне рэгулятараў росту. З дапамогай апошніх удаецца змяніць натуральны працэс развіцця культур, палепшыць іх адаптацыю да новых умоў вырастання, дапамагчы супрацьстаяць стрэсу і павысіць ура-джайнасць. Таксама ідзе хімічная апрацоўка ад шкоднікаў, якія з’яўляюцца сур’ёзнымі ворагамі культуры. Усяго ў гаспадарцы пасеяна 200 гектараў азімага рапсу: 160 – на зерне і 40 – на зялёную масу. Сёлета гаспадарка набыла новую машыну для ўнясення вадкіх арганічных угнаенняў МЖТ-11-Ф. А гэтую работу выконваюць вопытныя механізатары Аляксей Комар і Уладзімір Коваль.
На другім полі ідзе падкормка азімых збожжавых азотнымі ўгнаеннямі, якія павышаюць ўраджайнасць культуры і паляпшаюць яе якасныя характарыстыкі.
Якасць падкормкі выяўляецца ў паказчыках вегетатыўнай масы расліны і колькасці бялку. Пры недахопе азоту запавольваецца рост і развіццё расліны. За дзень атрымліваецца апрацаваць ад 80 да 100 гектараў азімых збожжавых. Заняты гэтай справай механізатары Сяргей Леська і Вадзім Вячорка. З імі на полі нязменны брыгадзір Уладзімір Пракаповіч, які па-гаспадарску расцілае плёнку, каб лішкі ўгнаення не сыпаліся на зямлю і не спалілі расліну.
– Усё трэба рабіць якасна, – кажа Уладзімір Сцяпанавіч. – Асабліва ў сельскай гаспадарцы, дзе ўсё ідзе па ланцугу. Дрэнна падкарміў культуру – атрымлівай дрэнны ўраджай, а значыць, кармоў не чакай добрых і гэтак далей. А нашы хлопцы – малайцы, адказныя і робяць сумленна.
Як толькі ўсталюецца спрыяльнае надвор’е, у ААТ «Кароцічы» пачнецца сяўба царыцы палёў – кукурузы. Стрымліваюць начныя замаразкі, якія не даюць зямлі прагрэцца. А аптымальная тэмпература для гэтай культуры павінна складаць 8-12 градусаў цяпла на глыбіні глебы ў 10 сантыметраў.
Пакуль жа ідзе культывацыя сельскагаспадарчых угоддзяў, прадугледжаных пад сяўбу кукурузы. Дарэчы, яе плануецца пасеяць на 500 гектарах, што на 30 гектараў больш, чым у мінулым годзе. На адным з палёў шчыруе механізатар з 27-гадовым стажам Іван Мельнік. Разам з ім працуе Аляксандр Клімовіч.
– Зямля нібы попел, тэрмінова патрэбен дождж, – робіць высновы вопытны працаўнік.
Галоўны аграном таксама згаджаецца: вільгаці ў глебе недастаткова для добрай усходжасці сельгаскультур. Якая б ні была дасканалая тэхналогія, апошняе слова заўсёды за надвор’ем. Усяго ў гаспадарцы ў гэтым го-дзе пасеяна 100 гектараў пшаніцы, 50 – ячменю, 50 – зернебабовых культур, 10 – гароху, 60 – люцэрны і 110 – аднагадовых культур. Сяўбу правялі ў даволі кароткі тэрмін – 20 дзён. Добра, што тэхніка не падводзіла, былі спрыяльныя пагодлівыя ўмовы. А самае галоўнае, канешне, гэта людзі. На «Джон Дзіры» і МТЗ 3522 працавалі Андрэй Дарошка, Аляксей Копец і Аляксей Кудласевіч, якімі ганарыцца кіраўніцтва гаспадаркі і дзякуе ім за добрасумленную працу.
Ганна МЕЛЬНІК
Фота аўтара
