Паслугі камунальнікаў: ёсць пытанні…

Тэма аказання паслуг жыллёва-камунальнай службай раёна хвалявала частку жыхароў, што тэлефанавалі ў ходзе правядзення «прамой лініі» памочнікам Прэзідэнта – інспектарам па Брэсцкай вобласці Анатолем Маркевічам.
На гэтым тыдні Анатоль Мечыслававіч, будучы на Століншчыне, вёў тэлефонны дыялог з жыхарамі па самых разнастайных пытаннях.
Людзі звярталіся з просьбамі дапамагчы вырашыць праблемы, напрыклад, з вызначэннем межаў зямельных участкаў, з устанаўленнем групы інваліднасці, з увекавечаннем памяці родных, загінуўшых падчас Вялікай Айчыннай вайны. Некалькі пытанняў тычылася добраўпарадкавання населеных пунктаў, а таксама рамонту дарог і інш.
Пры адказе на тэмы навядзення парадку памочнік Прэзідэнта Анатоль Маркевіч адзначыў, што і жыхары населеных пунктаў не павінны заставацца ў баку ад вырашэння пытанняў падобнага роду.
Як стала зразумелым у хо-дзе «прамой лініі», асобны блок пытанняў сфарміраваўся ў адносінах работы жыллёва-камунальнай гаспадаркі раёна. У прыватнасці, на сёння трэба разумець, што заключэнне насельніцтвам дагавораў на вываз адходаў з’яўляецца абавязковым на заканадаўчым узроўні. Але і выкананне камунальнікамі сваіх абавязкаў па зборы смецця ад домаўладанняў, яго вывазе, складанне зручных для людзей графікаў руху спецтранспарту – гэта першачарговая задача ЖКГ. У сувязі з гэтым пытанне работы Столінскай ЖКГ менавіта ў агучаным кірунку ўзята пад пільную ўвагу і будзе на пастаянным кантролі.
Калі прааналізаваць агучаныя людзьмі праблемы, то некаторыя з іх можна было вырашыць раней на мясцовым узроўні. Гэта таксама заўважыў Анатоль Мечыслававіч. Часам чалавек нават і не імкнуўся звярнуцца ў сельскі Савет ці райвыканкам. Хаця, зрабіўшы гэта, даўно б, напэўна, і забыў пра сваю праблему.
Пераважная колькасць жыхароў, якія патэлефанавалі ў гэты дзень памочніку Прэзідэнта, атрымала дакладныя адказы на свае пытанні. Некаторым яны будуць дасланы ў пісьмовым выглядзе пасля правя-дзення дадатковага разбіральніцтва.
Мы бачым, што сёння людзі маюць магчымасць звярнуцца да службовых асоб любога ўзроўню і з дапамогай асабістых прыёмаў, часам выязных, і «прамых тэлефонных ліній». Ды пры ўсім гэтым трэба разумець і меру адказнасці не толькі кіраўнікоў, але і саміх жыхароў. Калі чалавек жадае атрымаць менавіта такі адказ, які ён для сябе ўжо абазначыў, а не як не іншы, гэтага можа і не быць. Таму што ўсе дзеянні рэгламентуюцца на заканадаўчым узроўні. І трэба быць гатовым да гэтага, да чыноўніка якога б рангу вы ні звярнуліся.
Алена КЛІМУШКА
Фота аўтара