Па жыцці — аптымістка — Аксана Місюра 25 гадоў працуе сакратаром прыёмнай дырэктара Палескага лясгаса

Аксана Місюра 25 гадоў працуе сакратаром прыёмнай дырэктара Палескага лясгаса. Як адзначаюць яе калегі, з гадамі яна толькі папрыгажэла. Заўсёды са шчырай усмешкай, ніколі не бачылі яе ў дрэнным настроі.
Засмучацца Аксана Уладзіміраўна сапраўды не любіць, бо ўпэўнена ў тым, што любыя праблемы вырашальныя. Бо па жыцці – аптымістка.
Аксана – карэнная гарадчучка. Сюды ж вярнулася пасля заканчэння Столінскага дзяржаўнага аграрна-эканамічнага каледжа і ўладкавалася ў Палескі лясгас. За гэты час ёй давялося працаваць пры трох кіраўніках і ўсіх яна ўспамінае добрым словам. Калектыў за гэты час памаладзеў, прыйшло многа маладых спецыялістаў. Але адно ў ім засталося нязменным – гэта з’яднанасць і ўзаемапавага.
Гэта, дарэчы, было відавочна няўзброеным вокам, пакуль фатаграфавала жанчыну. Усе цікавіліся, калі можна будзе прачытаць матэрыял і дадалі: «Яна ў нас, як тая вясна».
Менавіта гэтая пара года любімая ў Аксаны Уладзіміраўны. Асабліва яна чакае май, калі ўсё ў квецені.
Вельмі любіць, калі распускаюцца ружы, якіх у яе аж 14 гатункаў! А яшчэ абажае хрызантэмы, якія ў мінулым годзе вельмі парадавалі, бо зацвілі ўсе 60 кустоў.
А вось самымі дарагімі кветкамі ў жыцці жанчына лічыць сваіх двух сыноў. Старэйшы Назар зараз студэнт Беларускага дзяржаўнага медыцынскага ўніверсітэта. Хоча стаць хірургам. Дарэчы, і малодшы сын Багдан, які ў гэтым годзе закончыць школу, таксама выбраў медыцыну.
Ёсць мара і ў яе – адправіцца ў марскі круіз па Міжземным моры. Вельмі любіць ваду, бо сама прадстаўнік воднай стыхіі – Рак па знаку задыяка.
Калі ёсць час, любіць пераглядваць старое кіно. Геніяльным лічыць фільм 1971 года «Афіцэры». А таксама ў захапленні ад «Унесённых ветром», асабліва ёй падабаецца галоўная гераіня Скарлет О’Хара. Імпануюць яе ўпэўненасць, смеласць і разам з тым жаноцкасць.
Надыходзячы Міжнародны жаночы дзень будзе адзначаць у кампаніі сябровак – Таццяны, Алены і Людмілы. Гэтай традыцыі ўжо многа гадоў. Ад кожнай гаспадыні – каронная страва. У Аксаны Уладзіміраўны гэта мясная запяканка. Збяруцца ў каго-небудзь дома, будуць жартаваць і ўспамінаць мінулае. Жанчыны ўсё ж такі.
Ганна
МЕЛЬНІК
Фота аўтара