Ёсць такое выказванне: калі ссек адно дрэва – пасадзі два. Вось чаму мнагалюдна было ў мінулую сераду ў парку вёскі Сямігосцічы. Там адбывалася значная падзея – 150 ліпаў і 150 клёнаў пасадзілі вучні школы, работнікі ААТ «Новая Прыпяць» і прадстаўнікі Альшанскага сельскага выканаўчага камітэта.
Хоць лесапасадка заўсёды прыбіралася сумеснымі сіламі школы, сельвыканкама і калгаса, з цягам часу яна, як і ўсё жывое на планеце, сталела. Было вырашана прыбраць старыя хворыя дрэвы, якія сталі небяспечнымі.
Паклапацілася пра новы пасадачны матэрыял ААТ «Новая Прыпяць», якое за свой кошт набыло дрэўцы ў пітомніку ў Івацэвічах.
– Канешне, кошт немалы, тым больш і за дастаўку мы разлічваліся. Але ці важна гэта ў параўнанні з тым, што зашуміць па-новаму стары парк? – падзяліўся меркаваннем дырэктар гаспадаркі Андрэй Засімовіч. – І сёння ў гэтым месцы мы не проста саджаем дрэвы, а ствараем будучыню для нашых дзяцей і ўнукаў.
Каб дрэўцы хутчэй набралі сілу, гаспадарка арганізавала іх паліў. Ра-зам з вучнямі 8-11 класаў шчыравалі і настаўнікі, якія запэўнілі, што догляд за новымі «зялёнымі суседамі» будзе пільны.
У Юліі Кулеш будзе таксама сваё дрэва
– Гэты парк – сімвал юнацтва не аднаго пакалення, – далучылася да размовы дырэктар школы Яніна Арлянін. – Безумоўна, шчымела сэрца, калі ён радчэў, хоць і было зразумела, што гэта правільнае вый-сце. Упэўнена, што сённяшні дзень запамятаюць усе вучні, якія прынялі ўдзел у гэтым значным мерапрыемстве.
Старшыня Альшанскага сельскага выканаўчага камітэта Віктар Гапко таксама выказаў думку, што новы парк упрыгожыць вёску. І абяцаў падумаць, як далей можна будзе добраўпарадкаваць гэтае месца для жыхароў. А яшчэ вырашана даць новаму парку назву, якая будзе вядома ў хуткім часе.
А пакуль, расціце, дрэўцы, і радуйце сваёй прыгажосцю!
Ганна МЕЛЬНІК
Фота аўтара
