Квітней, любімы Давыд-Гарадок!

Свята, якое аб’яднала людзей самых розных узростаў, спецыяльнасцяў і інтарэсаў. Нягледзячы на свой годны век – гораду споўнілася 924 гады – ён па-ранейшаму прыгожы, іскрыцца ўсмешкамі людзей, поўны энергіі і новых здзяйсненняў.
Урачыстае мерапрыемства адкрыў старшыня гарвыканкама Вячаслаў Стаднік:

– Мы па праве ганарымся слаўнай гісторыяй Давыд-Гарадка і яго традыцыямі, сучаснымі дасягненнямі і галоўным багаццем – працавітымі і таленавітымі гарадчукамі. Многае змянілася за ўсю гісторыю ў горадзе, але, нягледзячы на неаднаразовае разбурэнне, ён аднаўляўся і станавіўся ўсё лепш і прыгажэй. Адміністрацыя горада дзякуе кожнаму гараджаніну, які сваёй штодзённай працай і энергіяй уносіць неацэнны ўклад у развіццё горада.
Пасля Вячаслаў Васільевіч уручыў Ганаровыя граматы жыхарам, якія ўжо сёння пішуць гісторыю горада. Самыя шчырыя віншаванні гучалі ў адрас сямейных пар-юбіляраў і многіх жыхароў горада. Шмат слоў гучала ў адрас маладых, якія менавіта 10 жніўня стварылі сям’ю. Адзначыў старшыня і бацькоў, дзеці якіх атрымалі на ЦЭ па 100 балаў.

Раздзяліць з гарадчукамі святочны настрой прыехала дэлегацыя з Маларыты. У сваіх віншаваннях яны перадавалі жыхарам Давыд-Гарадка самыя цёплыя сяброўскія пажаданні, гаварылі аб важнасці ўмацавання партнёрскіх і пабрацімскіх адносін.
– На дзень горада мы прыязджаем ужо другі раз, – дзеліцца сваімі ўражаннямі начальнік аддзела ідэалагічнай работы і па справах моладзі Галіна Стасюк. – Прыемна, што горад прыгажэе і развіваецца. Відаць, што для кожнага жыхара Давыд-Гарадок – месца сілы, духоўнага адзінства і любові да малой радзімы. Заўжды Століншчына славілася сваімі працавітымі людзьмі, бо іх мэтанакіраванасць і ўпэўненасць у сваіх сілах заўсёды дазвалялі дасягаць такіх высокіх вынікаў.
Узгадалі ў гэты дзень і загінуўшых у гады Вялікай Айчыннай вайны. Супрацоўнікі Столінскага РАУС і РАНС усклалі кветкі да помніка і ўшанавалі ўсіх загінуўшых хвілінай маўчання.

Упрыгожваннем свята сталі выстаўкі-прэзентацыі і выстаўкі дэкаратыўна-прыкладной творчасці, якія арганізавалі прадпрыемствы горада.
Бібліятэка прэзентавала не толькі выстаўку, але фотакалаж. Велізарную падрыхтоўку ў правядзенні гэтага свята правялі работнікі Дома культуры.
Працавалі гандлёвыя рады і гульнявыя пляцоўкі, фотавыстаўка «Давыд-Гарадок у аб’ектыве».
ДЗЮСШ г. Давыд-Гарадка правяла спартакіяду сярод работнікаў прадпрыемстваў горада. Пераможцам стала каманда ўчастка Давыд-Гарадка Столінскага раёна газазабеспячэння ВУ «Пінскгаз», на другім месцы – вучні СШ № 1. Каманда ДГЭМЗа заняла трэцяе месца.
Палескі лясгас правёў спраборніцтвы па колцы дроў. І тут таксама выявіліся мацнейшыя гаспадары, якія атрымалі ад арганізацыі мёд і бярозавыя венікі.

Для моладзі, дзяцей і дарослых быў арганізаваны фестываль фарбаў.
Напрыканцы вечара выступіў фолк-гурт «Партызан FM».
Завяршыў святочны дзень феерверк і дыскатэка.
Вольга ГУСАК
Фота аўтара