15 сакавіка – Дзень Канстытуцыі Рэспублікі Беларусь. Гэта не проста дата ў календары, а падзея, якая мае глыбокі сэнс і значэнне для кожнага грамадзяніна краіны. Канстытуцыя – асноўны закон, падмурак дзяржаўнасці, які вызначае правы і свабоды чалавека, структуру ўлады і прынцыпы функцыяніравання грамадства.
Асноўны закон – чаму ён такі асаблівы для Століншчыны, дзе традыцыі і сямейныя каштоўнасці адыгрываюць значную ролю? Карэспандэнты «НП» даведаліся ў жыхароў раёна, наколькі важнае для іх гэтае свята і як яны яго разумеюць.
Юрый АНДРЭЙКАВЕЦ,
першы сакратар РК ГА «БРСМ»:
– З упэўненасцю магу адзначыць, что Дзень Канстытуцыі для падрастаючага пакалення і моладзі Століншчыны – гэта не толькі дзяржаўнае свята, а сведчанне нашай грамадзянскасці, волевыяўлення і крыніца правоў кожнага беларуса. Гэта дзень, які нагадвае кожнаму маладому чалавеку: ты грамадзянін, ты асоба, у цябе ёсць правы, абарона і магчымасці, але ёсць і адказнасць за краіну, у якой мы жывём. І ад таго, наколькі свядома ты будзеш ставіцца да гэтага, залежыць і твая будучыня, і будучыня Беларусі.
Мне не раз даводзілася выступаць ў розных калектывах, абмяркоўваць пытанні дзяржаўнай палітыкі, падтрымкі маладых спецыялістаў, таленавітай і адоранай моладзі, дзяржаўнай падтрымкі ініцыятыў. Кожны раз водгукі былі станоўчымі, а выступаючыя выказвалі імкненне вучыцца, працаваць, ствараць дзеля будучыні краіны. Мы ўпэўнены ў заўтрашнім дні дзякуючы Асноўнаму Закону.
У Канстытуцыі Рэспублікі Беларусь замацаваны найбольш прагрэсіўныя прынцыпы арганізацыі дзяржавы: прыярытэту правоў асобы, гуманізму, народаўладдзя і г. д. Прадугледжаныя Канстытуцыяй правы і свабоды асобы адпавядаюць усім асноватворным міжнародна-прававым актам у сферы правоў чалавека. Самае галоўнае – наш Асноўны Закон замацоўвае канкрэтныя дзяржаўныя гарантыі рэалізацыі правоў і свабод чалавека і грамадзяніна.
Народ Беларусі зрабіў свой выбар. Выбар у карысць эвалюцыйных пераўтварэнняў палітычнай сістэмы. Новую Канстытуцыю называюць Канстытуцыяй будучыні. Яна закранае ўсе сферы жыццядзейнасці чалавека, здаецца, што напісана асабіста пад кожнага з нас.
Вераніка КАЗАК,
настаўнік І ступені агульнай сярэдняй адукацыі Альшанскай СШ № 1:
– Для мяне і маёй сям’і Канстытуцыя Рэспублікі Беларусь – гэта не проста галоўны закон краіны, а падмурак стабільнасці, справядлівасці і гарант нашых правоў, шчыт, які абараняе годнасць кожнага чалавека. Канстытуцыя – гэта парадак і справядлівасць у нашай краіне.
Як шматдзетная маці, я штодня адчуваю адказнасць за будучыню сваіх дзяцей. Менавіта таму Канстытуцыя набывае для мяне асаблівае значэнне. Гэта не проста зборнік законаў, а гарантыя дабрабыту маёй сям’і і ўпэўненасці ў заўтрашнім дні. Я спакойная, ведаючы, што мы знаходзімся пад абаронай дзяржавы.
Дзеці ходзяць у школу, і гэта не проста магчымасць атрымаць веды. Гэта канстытуцыйнае права, якое гарантуе ім доступ да якаснай адукацыі. Дзякуючы гэтаму яны могуць развіваць свае здольнасці, адкрываць новыя гарызонты і рыхтавацца да дарослага жыцця. Школа – гэта не толькі навучанне, але і сацыялізацыя, фарміраванне асобы, выхаванне грамадзянскай пазіцыі. Усё гэта магчыма дзякуючы канстытуцыйным гарантыям.
Вядома, гэтым дакументам кіруюся і ў сваёй працы. Як настаўнік, выхоўваю навучэнцаў у духу патрыятызму, прывіваю ім не толькі творчыя навыкі, але і вучу любіць сваю Радзіму, паважліва ставіцца да яе законаў і традыцый.
Фёдар Стахавец,
трэнер ДЮСШ г. Століна па футболе:
– Будучыня любой краіны – гэта, перш за ўсё, дзеці і моладзь. Таму асабліва важна, што ў Беларусі на дзяржаўным узроўні вялікая ўвага надаецца спорту, фізічнай культуры і здароваму ладу жыцця.
Сёння спорт у нашай краіне – гэта не толькі спаборніцтвы і медалі. Гэта магчымасць для дзяцей развівацца, умацоўваць характар, вучыцца дысцыпліне, павазе, каманднай рабоце. І вельмі важна, што такія магчымасці сапраўды ствараюцца. У Беларусі будуюцца сучасныя спартыўныя аб’екты, развіваецца дзіцяча-юнацкі спорт, працуюць спартыўныя школы, секцыі, праводзяцца раённыя, абласныя і рэспубліканскія спаборніцтвы. Усё гэта дае дзецям шанц раскрыць сябе, знайсці любімую справу і, магчыма, зрабіць першы крок да вялікага спорту.
Калі казаць пра Столін, то ў нас для заняткаў спортам таксама створаны добрыя ўмовы. У горадзе ёсць годная база для трэніровак, развіваецца спартыўная інфраструктура, працуе дзіцяча-юнацкая спартыўная школа, дзе навучэнцы могуць займацца рознымі відамі спорту, у тым ліку футболам. Для трэнераў вельмі важна бачыць, што дзеці прыходзяць на заняткі з цікавасцю, а бацькі падтрымліваюць іх імкненне займацца спортам.
Футбол, як і любы від спорту, дапамагае выхоўваць не толькі моцных спартсменаў, але і годных людзей. На трэніроўках дзеці вучацца пераадольваць цяжкасці, дабівацца пастаўленых мэт, працаваць на агульны вынік. І гэта, на мой погляд, таксама напрамую звязана з тымі прынцыпамі, якія закладзены ў Канстытуцыі: адказнасць, павага да грамадства, імкненне прыносіць карысць сваёй краіне.
У Дзень Канстытуцыі жадаю ўсім міру, упэўненасці ў заўтрашнім дні, моцнага здароўя і новых дасягненняў. А нашым дзецям – як мага больш магчымасцяў для заняткаў спортам, развіцця сваіх здольнасцей і яркіх перамог – і на спартыўных пляцоўках, і ў жыцці.
Вольга Коваль,
намеснік дырэктара па выхаваўчай рабоце Кароціцкай сярэдняй школы, уладальніца ордэна Маці:
– З гонарам адзначу, што мне пашанцавала нарадзіцца ў нашай прыгожай сінявокай краіне. Бо ў ей можна спакойна працаваць, будаваць сем’і і выхоўваць дзяцей, – адным словам, ствараць шчасце сваімі рукамі. А ўсё таму, што ў нас захоўваюцца ўсе законы і правы, прадугледжаныя Канстытуцыяй Рэспублікі Беларусь. Гэта магу дакладна сцвярджаць і як мнагадзетная маці, і як прадстаўнік кіраўніцтва навучальнай установы.
Тое, што ў нашай дзяржаве падтрымка сям’і – нацыянальны прыярытэт, адчула на сваім асабістым вопыце. На пяцярых дзяцей атрымлівала выплаты ў сувязі з іх нараджэннем і выхаваннем на працягу трох гадоў. Таксама пасля з’яўлення ў нашай сям’і трэцяй дачкі Софіі мы атрымалі мацярынскі капітал. Да таго часу ў нас ужо быў пабудаваны свой дыхтоўны дом, таму гэтыя сродкі можам скарыстаць у будучыні на медыцынскія паслугі і адукацыю. У любым выпадку, дзяржава паклапацілася пра сваіх маленькіх грамадзян. Згадзіцеся, не ў кожнай краіне можна такое бачыць.
Апошнімі ў нашай сям’і нарадзіліся двайняты Цімур і Лізавета, і мне было вельмі дарэчы бясплатнае харчаванне дзяцей першых двух гадоў жыцця. А гэта вялікая фінансавая падтрымка.
Зараз двое старэйшых дзяцей наведваюць школу, трое – дзіцячы садок, за які прадугледжаны льготы ў выглядзе зніжэння платы напалову.
Што тычыцца прафесійнай самарэалізацыі, то са свайго вопыту магу дакладна сказаць: не трэба баяцца, што нараджэнне дзяцей «паставіць жыццё на паўзу». Дзеці дораць новы сэнс і дапамагаюць інакш зірнуць на многія рэчы.
Дадам, што ў нашай краіне створаны выдатныя ўмовы для атрымання якаснай і бясплатнай адукацыі, дзеці могуць спакойна набываць веды, паступаць у розныя навучальныя ўстановы, станавіцца дасведчанымі спецыялістамі. Гэта магчымасць шмат чаго варта, таму яе трэба шанаваць.
Да друку падрыхтавалі
Уладзімір ДАМАШЧУК,
Вольга ГУСАК,
Людміла КАСПЯРОВІЧ,
Ганна МЕЛЬНІК
