На базе СШ № 2 г. Століна прайшоў першы міні-EdCamp. Мерапрыемства сабрала больш за 70 удзельнікаў не толькі са Століншчыны, а і з Пінскага і Жыткавіцкага раёнаў, Мінска, а таксама Украіны.
Мерапрыемства аб’яднала педагогаў, якія называюць сябе «белымі варонамі» – вылучаюцца сваім творчым падыходам, маюць унікальны вопыт. Форма правядзення міні-EdCamp – (не) канферэнцыя. Гэта нефармальны форум педагогаў і працуюць педагогі ў нефармальнай абстаноўцы, вядуць сябе таксама досыць нефармальна, а яшчэ што цікавей – выказваюць нефармальныя думкі і прапановы па навучанні і выхаванні дзяцей.
Адкрываючы мерапрыемства, дырэктар СШ № 2 г..Століна Ала Лазіцкая спынілася на гісторыі аналагічных мерапрыемстваў і іх форме. EdCamp ахапіў ужо 44 краіны свету. І ў Беларусі прайшло ўжо тры нацыянальныя мерапрыемствы.
У час правядзення былі арганізаваны дзве экспертныя сесіі і чатыры настаўніцкія. Хаця ідэй на педагагічныя сесіі было пададзена аж 10. Але з дапамогай галасавання, зацікаўленасці педагогаў выбрана толькі чатыры. Канкурэнцыя была вялікай!
У якасці экспертаў выступілі Кацярына Куксо (Масква – Мінск) з тэмай «Даследаванне ўрока як форма арганізацыі метадычнай работы ў школе», Іван Пясенка з Бабруйска – «Кіно можа пашкодзіць дзецям (вопыт школьнага кінаклуба)». Госці з Украіны – Руслан Рэвук гаварыў аб навучанні робататэхніцы, а Лідзія Юшкевіч і Ала Пігаль правялі эмітацыю навучальнага дня ва ўкраінскай школе.
Не адсталі ад гасцей і педагогі Століншчыны. Сярод абраных галасаваннем – «Школьнае тэлебачанне: быць або не быць?» педагогаў і вучняў СШ № 2 г. Століна. Юныя ўдзельнікі Анастасія Домніч (студэнтка 1 курса факультэта сацыякультурных камунікацый БДУ, якая спецыяльна прыехала на мерапрыемства) і Кацярына Савіцкая (вучаніца 8 класа СШ № 2 г. Століна) правялі сесію для настаўнікаў і пакарылі ўсіх вопытам сваёй работы на школьным тэлебачанні. У выніку яны знялі сюжэт, які прадаставілі на прагляд гледачоў праз паўгадзіны.
Настаўнік Беражноўскай СШ Сяргей Цімашук гаварыў аб сваёй адукацыйнай вандроўцы ў CERN – еўрапейскую арганізацыю па ядзерных даследаваннях.
Алена Шумак з Пінска цікава прэзентавала сваю работу па выкарыстанні прасторы навучальнага кабінета: як задзейнічаць у працэсе не толькі дошку, а і падлогу, столю.
Яшчэ адзін педагог з Пінска – Таццяна Пархамчук прэзентавала STEM-падыход у выкладанні біялогіі.
Аншлаг быў на ўсіх сесіях дакладчыкаў – як экспертаў, так і педагогаў. Форма правя-дзення прыйшлася даспадобы як гасцям, так і настаўнікам нашага раёна. Ёсць чаму павучыцца і ёсць пра што расказаць у час такіх мерапрыемстваў.
Таццяна СЕГЕН
Фота арганізатараў
EdCampBelarus
