У мінулую пятніцу мне давялося папрацаваць… паштальёнам. Ці, лепш сказаць, памочнікам паштальёна аддзялення сувязі Альшаны Марыі Андрусевіч. Не толькі дапамагала разносіць газеты, але і знаёмілася з меркаваннямі нашых чытачоў.
А перад гэтым зайшла на аддзяленне сувязі, дзе паштальёны разбіралі газеты і часопісы. Работы хапае: аграгарадок Альшаны адзін з самых вялікіх у нашым раёне. У аддзяленні сувязі Альшаны працуе пяць паштальёнаў – Вольга Ярмоліч, Алена Казак, Марыя Кірыловіч, Міхаіл Садчанка і Марыя Андрусевіч. Акрамя карэспандэнцыі ў свае сумкі кладуць пасылкі з кітайскіх сайтаў і пісьмы. Як расказала начальнік аддзялення Святлана Лемяза, у іх абслугоўванні 7200 жыхароў Альшан.
Пра падпіску нагадваюць самі паштальёны. Толькі некалькі чалавек прыйшлі на аддзяленне сувязі, каб выпісаць газету.
– Зараз большасць людзей знаёміцца з навінамі раёна ў інтэрнэце, – расказваюць паштальёны. – Маўляў, так зручней. Толькі пенсіянеры звыклі па-ранейшаму. А вось з моладдзю складаней, вельмі зараз усе яны мабільныя.
Расклаўшы газеты ў вялікія сумкі, ідзём з Марыяй Андрусевіч, якая, дарэчы, працуе больш за 10 гадоў, знаёміцца з нашымі чытачамі. Спрыяла сонечнае надвор’е, таму амаль усе яны знаходзіліся на вуліцы. Дзмітрый Кастэнка якраз са сваім зяцем займаліся добраўпарадкаваннем тэрыторыі каля дома.
– Газету выпісваем 22 гады. Чытаем ад вокладкі да вокладкі. На мой погляд, не хапае матэрыялаў на тэму эканомікі. У апошні час радуюць крытычныя артыкулы, у якіх уздымаюцца надзённыя праблемы. Гэта добра, калі газета чуе сваіх падпісчыкаў.
А вось Віктар Домніч – былы настаўнік фізікі і матэматыкі жадае, каб у газеце з’явілася рубрыка пра тое, як даглядаць зямлю.
– Мы ўсе працуем на зямлі, – дзеліцца сваімі прапановамі Віктар Дзям’янавіч. – І я таксама. Ёсць парнічок невялікі, дзе вырошчваю агуркі і таматы. І мне, і іншым жыхарам было б цікава ведаць, як вызначыць кіслотнасць глебы, напрыклад, ці як даглядаць буякі. Упэўнены, такую рубрыку абавязкова трэба зрабіць у газеце.
Згодна з ім і яшчэ адна чытачка Кацярына Кадоліч. Яна таксама многа працуе на зямлі. Ёсць у гаспадарцы козы, свінні, куры. Разам з паштальёнам мы яе сустрэлі, калі яна завіхалася каля парніка.
– Хочацца, каб у раёнцы было больш карысных парад па вядзенні гаспадаркі. Усе ж мы людзі вясковыя, працуем на зямлі. А яшчэ, як маці чатырох дачок, добра было б пачытаць пра сучасную моду, рэцэпты прыгажосці і гэтак далей.
Да маладой мамы Рыты Адзінокай мы зайшлі дадому. Зараз яна знаходзіцца ў дэкрэтным водпуску: гадуе дачушак Кацярыну і Таццяну. Па прафесіі – настаўнік пачатковых класаў.
– Вельмі добра, што ў “Навінах Палесся” многа расказваецца пра адукацыю. Мне, як настаўніку, гэта вельмі важна. Я даведваюся, у якой школе, напрыклад, прайшоў абласны семінар. І вучні якой установы сталі пераможцамі алімпіяды і многае іншае. Мы з мужам вельмі любім нашу раёнку. Нават спрачаемся, хто першы ў рукі возьме (смяецца). Цікавімся, хто нарадзіўся, хто ажаніўся, каго віншуюць. Пачытаеш газету – і ведаеш, што ў раёне робіцца.
Мне, як карэспандэнту, было вельмі цікава і самае галоўнае – карысна пачуць нашых чытачоў. Прыемна, што людзі чытаюць газету, дзеляцца сваімі прапановамі і заўвагамі. Мы абавязкова прымем іх да ведама, бо нам каштоўны кожны наш падпісчык. І мы будзем старанна працаваць, каб вы, паважаныя чытачы, сустрэлі новы год з “Навінамі Палесся”!
Ганна МЕЛЬНІК
Фота
аўтара
