Ад афармлення да перапланіроўкі

21 лютага сваё прафесійнае свята і 35-годдзе са дня заснавання сістэмы адзначаюць работнікі адной з найстарэйшых службаў Беларусі, якая займаецца картаграфіяй, геадэзіяй і землеўпарадкаваннем.
Напярэдадні прафесійнага свята пагутарылі са спецыялістам Давыд-Гарадоцкага бюро Пінскага філіяла РУП «Брэсцкае агенцтва па дзяржаўнай рэгістрацыі і зямельным кадастры» Марынай Харашун, якая больш за 11 гадоў добрасумленна працуе на карысць сваіх землякоў.

Прыходзячы ў Давыд-Гарадоцкае бюро, многія жыхары не толькі Столінскага раёна, але Рэспублікі Беларусь сутыкаюцца з неабходнасцю вырашэння пытанняў, звязаных з нерухомасцю, размешчанай у давыд-гарадоцкай зоне – ад афармлення дакументаў на зямельны ўчастак, новых дамоў, а таксама рэгістрацыі іх змяненняў, звязаных з перапланіроўкай (перабудовай) і г. д. І менавіта тут, за сталом, дзе кіпіць работа з чарцяжамі, планамі і шматлікімі паперамі, іх сустракае Марына Харашун. За сваю працоўную дзейнасць тут яна не толькі паглыбілася ва ўсе нюансы работы бюро, але і зарэкамендавала сябе як адказны, уважлівы і кампетэнтны спецыяліст.
– Мой працоўны дзень напоўнены разнастайнымі задачамі: гэта і прыём грама-дзян, і кансультацыі па складаных пытаннях, і работа з тэхнічнай дакументацыяй, і выезды на аб’екты для правядзення замераў, – працягвае Марына Леанідаўна. – Кожная з гэтых задач патрабуе не толькі глыбокіх ведаў нормаў заканадаўства, але і асаблівага падыходу да людзей.

Вялікую ўвагу спецыяліст па тэхнічнай інвентарызацыі надае дакладнасці і акуратнасці ў рабоце з дакументамі. Бо любая памылка можа прывесці да сур’ёзных наступстваў для ўладальнікаў нерухомасці. Таму кожны чарцёж, кожны план, кожная даведка праходзяць і праз яе ўважлівыя рукі, перш чым патрапіць да наступнага этапу апрацоўкі. Яна разумее, што за кожнай паперай стаіць лёс чалавека, яго дом, яго маёмасць, і ставіцца да гэтага з максімальнай адказнасцю. А зона абслугоўвання вельмі вялікая!
Гэта не проста словы: на тэрыторыі, якую абслугоўвае Давыд-Гарадоцкае бюро, знаходзіцца вялікая колькасць прыватных домаўладанняў, кватэр плюс да таго розныя прамысловыя прадпрыемствы і вытворчасць, фермерскія гаспадаркі, розныя арганізацыі, камунікацыі, якія таксама падлягаюць інвентарызацыі. Спецыялістам бюро даводзіцца выязджаць на самыя розныя аб’екты.
– Наша работа вельмі цікавая, але ў той жа час і адказная, карпатлівая, патрабуе павышанай увагі, – кажа спецыяліст Давыд-Гарадоцкага бюро. – Мы не маем права на памылку.
Акрамя непасрэднай работы з кліентамі і дакументамі, Марына Харашун пастаянна ўдасканальвае свае веды. Гэта дазваляе ёй заўсёды быць у курсе апошніх змяненняў і прадастаўляць грамадзянам самую актуальную і дакладную інфармацыю.

– Нашу сферу не абыхо-дзяць сучасныя інфармацыйныя тэхналогіі, – тлумачыць мая суразмоўца. – Толькі за апошні год адразу дзве значныя змены ў галіне дзяржаўнай рэгістрацыі нерухомай маёмасці, правоў на яе і пагадненняў з ёю. Зараз на рэгістрацыю сваёй маёмасці можна падаць заяву ў любую арганізацыю па дзяржаўнай рэгістрацыі па месцы жыхарства заяўніка і забраць гатовыя дакументы.
З 11 чэрвеня 2025 года змяніўся парадак узаема-дзеяння паміж натарыусам і рэгістратарам. Цяпер і натарыусы надзелены паўнамоцтвам выдаваць пасведчанні аб дзяржаўнай рэгістрацыі маёмасці, што вызваляе грамадзян ад наступнага звароту ў рэгіструючы орган.
Марына Харашун па адукацыі эканаміст. Пасля заканчэння СШ № 2 г. Давыд-Гарадка паступіла ў Беларускі гандлёва-эканамічны ўніверсітэт спажывецкай кааперацыі ў Гомелі і назад вярнулася на сваю малую радзіму. Многія гады яна займала пасаду эканаміста ў Палескім лясгасе, але, калі ў 2014 годзе перад ёй адчыніліся дзверы ў зусім іншую сферу – бюро тэхнічнай інвентарызацыі, – без ваганняў перайшла на новае месца працы.

– Я чалавек, які любіць развівацца, – з усмешкай кажа Марына Леанідаўна, тлумачачы сваё рашэнне.
Менавіта гэтая ўнутраная патрэба ў пастаянным навучанні і засваенні новага стала ключавым фактарам, які заахвоціў яе змяніць звыклую і зразумелую сераду эканомікі на нязведаныя прасторы тэхнічнай інвентарызацыі. Пераход з адной структуры ў іншую, асабліва калі яны настолькі розныя, заўсёды спалучаны з пэўнымі цяжкасцямі. Але, як адзначае Марына Леанідаўна, яна ні разу не пашкадавала аб сваім выбары.
– Як матэматыка, так і чарчэнне мне заўсёды даваліся лёгка яшчэ ў школе, – успамінае мая суразмоўца. – Таму досыць хутка асвоіла новую пасаду.
Асаблівую падзяку Марына Леанідаўна выказвае сваім былым калегам-настаўнікам Наталлі Кецька і Дзмітрыю Канапліцкаму.
– Удзячная ім за падтрымку, цярпенне і паразуменне, – з удзячнасцю адзначае Марына Леанідаўна. – Яны шмат чаму мяне навучылі.

Гэтыя словы дарагога каштуюць, бо менавіта падтрымка калег-настаўнікаў у перыяд адаптацыі да новай працы грае вырашальную ролю для любога чалавека і ў любой прафесіі. Узаемадапамога і добразычлівасць калег стварылі для спецыяліста камфортную атмасферу, у якой яна адчувала і адчувае сябе ўпэўнена і па сённяшні дзень. Цяпер яна з’яўляецца тым настаўнікам, які падтрымлівае маладых спецыялістаў у гэтай сферы.
Марына Леанідаўна адзначае, што яе праца – гэта не проста набор абавязкаў, а магчымасць быць карыснай лю-дзям, дапамагаць ім у вырашэнні важных жыццёвых пытанняў. І гэтае ўсведамленне надае ёй сілы і натхненне кожны дзень прыходзіць у бюро і з поўнай аддачай працаваць.
Наперадзе ў спецыяліста тэхнічнай інвентарызацыі шмат задач і магчымасцей для развіцця. А пакуль, пагружаная ў чарцяжы, яна чэрпае сілы ў родным куточку, дзе яе заўсёды чакаюць і бязмерна падтрымліваюць родныя і блізкія людзі.

Вольга ГУСАК
Фота аўтара