Знаёмцеся: Варвара Якуновіч – вучаніца 6 класа Беражноўскай сярэдняй школы.
Варвара – мэтанакіраваная, старанная, уважлівая дзяўчына. Актывістка, спартсменка і да таго ж вельмі сціплая і працавітая.
У дзяўчынкі рознабаковыя інтарэсы. Наведвае Дзіцяча-юнацкую спартыўную школу пярвічнай прафсаюзнай арганізацыі КСУП «Беражное». Займаецца вольнай барацьбой. У асабістай скарбонцы дзяўчынкі шматлікія ўзнагароды.
– Гэтым відам спорту займаюся шэсць гадоў, – удакладняе Варвара. – Адна з асноўных прычын, па якой абрала вольную барацьбу, – свабода руху. Тут няма жорсткіх рамак і абмежаванняў – можна выкарыстоўваць любыя тэхнікі і прыёмы, каб перамагчы. Акрамя таго, вольная барацьба патрабуе ад мяне пастаяннага развіцця і ўдасканалення.
Трэнер Сяргей Клімушка кажа, што Варвара вельмі адказная і сур’ёзная, таму з лёгкасцю перамагае. У гэтым годзе ўдзельнічала ў адкрытым першынстве па вольнай барацьбе ў г. Бяроза і заняла першае месца.
Займаецца Варвара два гады і ў школе мастацтваў.
– Канешне, у гэтым накірунку я паказваю не такія выдатныя поспехі, як у спорце, але з задавальненнем наведваю заняткі, – з усмешкаю расказвае дзяўчынка. – Яшчэ люблю катацца на веласіпедзе, гуляць з сяброўкамі ў розныя гульні і з радасцю дапамагаю сваім бацькам у хатніх справах.
Вольга ГУСАК
Фота аўтара
