Прайшлі раённыя дажынкі, але аграрыям пакуль не да адпачынку. Напрыклад, у ААТ «Новая Прыпяць» убіраюць кукурузу на сянаж.
Туды мы накіраваліся з кіраўніком вытворчага ўчастка № 2 Аляксандрам Мазалём, які адзначыў, што нашай краіне ў гэтым годзе пашанцавала з надвор’ем: нягледзячы на дажджлівы ліпень, умовы былі і застаюцца даволі спрыяльнымі. Кукуруза ў некаторых месцах дасягае амаль чатырох метраў, нядрэнная і зярняўка, таму прычэпы машын набіваліся літаральна за некалькі хвілін. Усяго на гэтым вытворчым участку на адвозцы заняты сем адзінак тэхнікі. Яны з поля адпраўляюцца да сянажнай траншэі, якую закладваюць у Давыд-Гарадку.
На МАЗе многа гадоў працуе Міхаіл Альгамец, які яшчэ юнаком прыйшоў у гаспадарку. Яго малодшы брат Аляксей – таксама вадзіцель.
На кормаўборачных камбайнах яшчэ адзін сямейны тандэм Андрайчукоў. У бацькі Міхаіла камбайн замежнай вытворчасці Krone BiG X 780, якому два гады. А вось у яго сына Аляксандра, які да таго ж з’яўляецца механікам у гаспадарцы, айчынны агрэгат – «Палессе». Як спецыяліст, ён адзначае, што нашы камбайны пастаянна мадэрнізуюцца і зараз практычна не ўступаюць па тэхнічных характарыстыках.
На полі, дзе заканчвалася сяўба азімага рапсу, працуе Павел Сямейка. За 11 дзён ён пасеяў 600 гектараў культуры, якая, да слова, у гэтым годзе прынесла добры прыбытак.
– Убралі больш за дзве тысячы тон і ўсё рэалізавалі па выдатнай цане, – пацвярджае лічбамі дадзены факт Аляксандр Мазоль. – Рапс добра перазімаваў, але з-за дажджоў давялося яго дадаткова апрацоўваць. Увогуле, культура гэта надта патрабавальная, таму клопатаў з ёй у агранамічнай службы хапае.
Яшчэ адна работа, якой заняты ў гаспадарцы, – гэта адвозка саломы. Уся яна канчаткова спрэсавана і чакае сваёй чаргі на полі.
Развітваемся з ААТ «Новая Прыпяць» ненадоўга: хутка пачнецца поўнамаштабная сяўба азімых культур, ад якасці якой залежыць ура-джай ужо наступнага года. А калі будзе хлеб, то будзе і да хлеба.
Ганна
МЕЛЬНІК
Фота аўтара
